„Gerði klárlega mistök“

„Ég gerði klárlega mistök sem ég tek fulla ábyrgð á. Þetta eru mistök og ég hefði ekki átt að gera þetta. Það er ekkert sem ég get gert í því núna,“ sagði Pétur Viðarsson, leikmaður FH, við netmiðilinn fótbolti.net í dag en Pétur fékk harkalega gagnrýni fyrir atvik sem átti sér stað í leik FH og ÍBV í Pepsi-deild karla í knattspyrnu í Kaplakrika í gær.

Pétur og íranski sóknarmaðurinn Shahab Zahedi lentu í rimmu úti við hliðarlínuna sem endaði með því að Pétur lét sig falla í grasið með miklum tilþrifum og hélt fyrir andlitið.

Ég sá þetta ekki fyrr en í morgun. Ég legg það ekki í vana minn að skoða fjölmiðlana eftir leiki. Ég fékk að heyra í morgun og á æfingu að umræðan var gífurleg. Það er kannski það skemmtilega við fótboltann. Það mega allir hafa sína skoðun og mér fannst þetta í hreinskilni vera sanngjörn umfjöllun. Auðvitað eru margir sem fara lengra í að tjá sig en aðrir og eru harðari en það er allt í lagi. Það er skemmtilegt að allir mega hafa sína skoðun,“ segir Pétur við fótbolti.net.

• Blogga um frétt