Virkaði vel að skipta um leikkerfi

„Ég held að þetta hafi verið sanngjörn úrslit svona þegar upp er staðið. Þetta var hörkuleikur tveggja góðra liða og jafntefli sanngjörn niðurstaða,“ sagði Heimir Guðjónsson, þjálfari FH, í samtali við mbl.is, eftir 2:2-jafntefli liðsins gegn KR í fimmtu umferð Pepsi-deildar karla í knattspyrnu á Alvogen-vellinum í kvöld.

Heimir ákvað að breyta úr leikkerfinu 3:4:3 sem liðið hefur spilað mestan hluta leikja sinna í sumar yfir í hið gamalgróna leikkerfi 4:3:3 sem reynst hefur vel hjá FH undir stjórn Heimis.

„Mér fannst það koma ágætlega út að skipta um leikkerfi. Við vildum reyna að koma þeim aðeins á óvart með þessu útspili okkar. Við hefðum mátt halda boltanum aðeins betur og vera aðeins klókari í ákveðnum stöðum sem við vorum að skapa okkur,“ sagði Heimir um spilamennsku FH í leiknum.

FH hefur sex stig eftir fimm umferðir og er sjö stigum á eftir Stjörnunni sem trónir á toppi deildarinnar með 13 stig.

„Mér fannst það ekki sýna sig í spilamennsku okkar að það sé komin einhver örvænting í leik okkar þrátt fyrir slæm úrslit í síðustu leikjum liðsins. Það var góð liðsheild í liðinu í dag að mínu mati og leikmenn liðsins voru tilbúnir til þess að berjast fyrir hver annan. Við byggjum á því í næstu leikjum liðsins,“ sagði Heimir um stöðu liðsins.

• Blogga um frétt