Það mátti heyra saumnál detta í Royal Albert Hall á sunnudaginn þegar Vilhjálmur Bretaprins og Katrín hertogaynja gengu inn í salinn til að vera viðstödd afhendingu BAFTA-verðlaunanna. Katrín var afar glæsileg í hvítum kjól en svart, hvítt og klassískt var áberandi meðal stjarnanna í London á sunnudagskvöldið.
Kjóll hertogaynjunnar var frá Alexander McQueen en hertogaynjan er þekkt fyrir að klæðast merkinu þegar mikið liggur við. Önnur öxlin var ber og nutu eyrnalokkar sem voru í eigu Díönu prinsessu því sín afar vel við kjólinn sem og armband frá Elísabetu drottningu.
Eins og sjá má á myndum frá rauða dreglinum voru hjónin ekki þau einu sem kusu að klæðast hvítu og svörtu.