Don Cano framleiðir nú enga krumpugalla

Sænski fatahönnuðurinn, Jan Davidsson, ber ábyrgð á því að Íslendingar klæddust krumpugöllum í stíl fyrir 30 árum þegar Don Cano var upp á sitt besta. Í ár eru 30 ár síðan fyrirtækið toppaði sig og því ekki úr vegi að endurvekja það með nýjum áherslum. 

Síðan þá hefur margt gerst í lífi Jan. Hann starfaði sem yfirhönnuður hjá 66°Norður og svo stofnaði hann Cintamani ásamt fleirum. Nú er hann hinsvegar kominn aftur heim og búinn að dusta rykið af fyrirtækinu sem umbylti íslenskri fatatísku á sínum tíma. Hann er þó ekki að fara að framleiða sömu föt í nýjum efnum heldur hefur hann þróast mikið sem hönnuður á þessum tíma. Hann segir að efnin sem hann er að nota í dag séu mjög tæknileg, í raun hátækniefni enda séu kröfur nútímafólks miklar. 

Þegar hann er spurður að því hvers vegna hann hafi ákveðið að endurvekja merkið núna segir hann það vera vegna þess að honum liggi mikið á hjarta og hann hafi viljað koma þessari línu á markað núna. Um er að ræða bæði útvistarlínu og outdoor-línu eða föt fyrir heljarmenni sem búa á hjara veraldar. 

„Þessi lína er fyrir alla sem búa á þessu norðurhveli jarðar. Vörurnar eru í raun fyrir alla, gamla og unga eða allt frá 8 ára upp í 100 ára.“

Þegar Don Cano var upp á sitt besta voru krumpugallarnir vinsælir og sniðin voru víð. Anorakkar voru áberandi, víðar buxur og svo þótti mest smart að vera í stíl. Í eins jakka og buxum og ennþá er það rifjað upp þegar hjón voru í eins krumpugöllum. 

„Efnin sem við erum að vinna með í dag innihalda nýjustu tækni í efnum og hefur orðið mikið stökk fram á veginn miðað við það sem við vorum að vinna með fyrir 30 árum. Auðvitað erum við að vinna með sama DNA, annað væri bara hégómi,“ segir hann. 

Þegar Jan er spurður að því hvað hann taki með sér úr vinnu sinni sem yfirhönnuður hjá 66°Norður og fyrir Cintamani segir hann að Don Cano sé í raun móðir beggja þessara merkja. 

„Við erum fyrst og fremst að leita að því ríka DNA sem einkennir Don Cano. Þegar merki er orðið svona gamalt leitar það í meiri einfaldleika. Í dag erum við að byggja upp merki og það hefur ekkert að gera með Cintamani eða 66°Norður. Handbragð og mitt DNA er þó einkennandi í allri línunni,“ segir hann.