Síðustu ár hafa fáir aðrir en leikskólakrakkar komist upp með að ganga með lambhúshettur. Íslensk veðrátta kallar þó oft á þetta höfuðfat og er nú svo komið að Calvin Klein hefur gefið grænt ljós á lambhúshetturnar.
Verið er að sýna haust- og vetrartískuna 2018 í New York þessa dagana. Á tískusýningu Calvin Klein voru lambhúshettur paraðar við síðkjóla jafnt sem vinnugalla og er nokkuð ljóst að þær hæfa því hvaða tilefni sem er, hvort sem það er árshátíð eða vinna á mánudagsmorgni.
Lambhúshetturnar voru vel flestar prjónaðar með líflegu og skemmtilegu munstri eins og sjá má á myndum frá tískusýningunni.