Miðarnir streyma út á 20 ára afmælistónleika Írafárs í Hörpu næsta sumar. Birgitta Haukdal, stjarna sveitarinnar, vakti ekki bara athygli fyrir ljúfa tóna heldur líka skemmtilegan fatastíl. Smartland leit yfir stíl Birgittu á Írafárs-árunum.
Fatastíll Birgittu á Írafárs-árunum var eftirtektarverður og voru margar ungar stúlkur sem litu upp til Birgittu. Margt í fataskáp Birgittu á þessum árum kom úr tískuvöruversluninni Kiss í Kringlunni en búðin hætti fyrir tæpum þremur árum.
Birgitta sem var sólbrún og sælleg allan ársins hring er og var dökkhærð en á þessum árum skartaði hún oft stórum og miklum ljósum strípum.
Birgitta notaði mikið hatta og húfur á tónleikum. Þegar Birgitta var sem vinsælust var netatískan í hámarki og átti Birgitta meðal annars netagrifflur og boli.