Ástin sveif yfir vötnum á kjörstöðum og kosningavökum um helgina. Það hefur ekki síður reynt á maka stjórnmálafólks á undanförnum vikum en stjórnmálafólkið sjálft. Betri helmingar margra voru í stuði langt fram á nótt.
Á kosningavöku Framsóknarflokksins smellti Milla Ósk Magnúsdóttir kossi á sinn mann, Einar Þorsteinsson. Á sömu vöku hélt Magnús Óskar Hafsteinsson þétt utan um eiginkonu sína, Lilju Dögg Alfreðsdóttur, varaformann Framsóknarflokksins.
Jón Skaftason, eiginmaður Hildar Björnsdóttur, oddvita Sjálfstæðisflokksins, stóð þétt við hlið konu sinnar.
Arna Dögg Einarsdóttir, eiginkona Dags B. Eggertssonar, borgarstjóra í Reykjavík, vakti fram á nótt með sínum manni.
Líf Magneudóttir mætti hress og kát á kjörstað ásamt sambýlismanni sínum, Snorra Stefánssyni. Það var bjart yfir þeim og Snorri nokkuð léttklæddur.
Hin nýbakaða móðir, Dóra Björt Guðjónsdóttir, mætti á kjörstað ásamt sambýlismanni sínum, Sævari Ólafssyni og ungum syni þeirra.
Í Vestmannaeyjum studdi Hildur Hilmarsdóttir eiginmann sinn, Pál Magnússon. Alþingismaðurinn fyrrverandi náði kjöri sem fulltrúi framboðsins Fyrir Heimaey.