Borgar Þór Einarsson, aðstoðarmaður Guðlaugs Þórs Þórðarsonar, og Sigríður Mogensen, sviðsstjóri hjá Samtökum iðnaðarins, gengu í hjónaband um helgina.
Athöfnin sjálf fór fram í Dómkirkjunni í Reykjavík og var veislan haldin í Iðnó. Mikið stuð var í veislunni en utanríkisráðherra, Guðlaugur Þór Þórðarson, var veislustjóri.
Geir Haarde, sendiherra Íslands í Washington, hélt ræðu en hann er stjúpfaðir Borgars Þórs og eiginmaður Ingu Jónu Þórðardóttur móður Borgars Þórs. Geir sló á létta strengi í ræðunni og gantaðist með það að vonandi væri enginn að taka ræðuna hans upp.