Karlmaður sendir inn bréf þar sem hann kynntist giftri konu fyrir þremur árum og hefur verið viðhaldið hennar síðan. Hann spyr hvort hann sé að sóa tímanum sínum?

Sæl

Ég kynntist konu fyrir 3 árum sem er gift. Ég hef verið viðhaldið hennar síðan þá. Hún hefur alltaf sagt mér að ég sé henni allt og hún vilji bara framtíð með mér. Hún segir að hún sé að skilja og eiginmaður hennar sé að flytja út. Ég hef pressað mjög mikið á hana að klára þetta allt en alltaf koma einhverjar afsakanir af hverju hún þarf að fresta þessu. Hún á börn og segir oft að það sé út af þeim sem hún geti ekki skilið núna. Held að flestir í kringum okkur viti alveg að hún sé gift og mig grunar að eiginmaðurinn hennar viti líka af þessu. Á ég að gefa henni meiri tíma eða er ég bara að sóa tímanum mínum?

Kveðja, J

Elínrós Líndal starfar sem einstaklings- og fjölskylduráðgjafi. mbl.is/Eggert

Hæ hæ. 

Ég veit ekki hversu vinsæl ég verð hjá þér eftir svarið mitt en þú sendir á mig svo hér kemur það:

Mín persónulega skoðun er sú að þú ert að sóa tímanum þínum, ekki spurning. En faglega skoðun mín er sú að þessi kona er að gefa þér tækifæri til að skoða þína stöðu í lífinu. Tilfinningar, hugmyndir um ást, meðvirkni, samband við stórfjölskyldu, vini og jafnvel vinnuveitendur ef því er að skipta.

Af hverju viltu gifta konu?

Hvað mun koma í veg fyrir að hún haldi fram hjá þér líka?

Hver eru grunngildi þín í lífinu?

Hvert stefnir þú?

Þegar ég fæ fólk í þinni stöðu til mín í ráðgjöf vinn ég vanalega ekki með því nema það sé tilbúið að svara þessum spurningum með mér og taka nokkurra vikna fráhald frá því að vera viðhald. 

Fólk verður mjög veikt í þeirri stöðu sem þú ert í og ég myndi ekki óska óvini mínum að ganga í gegnum það sem þið eruð að fara í gegnum núna, í raun og veru öll. Þú, konan, eiginmaður hennar og börn. 

Ég myndi fá þig til að fara í þá grunnvinnu sem þarf til að geta gert samning við þig sjálfan, síðan ef þig langaði í samband sem myndi endast með henni þyrftir þú að gefa henni svigrúm til að skilja á sínum hraða. Á sínum forsendum þegar hentar henni. 

Ég er alls ekki að dæma þig, konuna eða eiginmanninn. Enda er ég ekki siðfræðingur heldur sambandsráðgjafi. Það sem ég veit hins vegar út frá reynslu minni er að þessi staða sem þið eruð í „triggerar“ margt af því versta hjá ykkur öllum. Eins og ég les út úr spurningunni þinni, og afsakaðu ef ég er að alhæfa of mikið, þar sem ég er einungis með nokkur orð að styðjast við og ég átta mig á að þarna er einungis brotabrot af sögunni sagt.

En þú sýnir einkenni stjórnsemi að setja ekki kærleiksrík mörk - og ert þannig að reyna að stjórna atburðarásinni í hennar lífi. Hún virðist meðvirk með ykkur báðum, en eilítið meira með eiginmanni sínum (sem gefur mér til kynna að öryggi hennar liggur í því sambandi). Síðan hlýtur eiginmaðurinn að vera meðvirkur með henni (eða þau í opnu hjónabandi), fyrst hann veit af þessu en setur ekki mörk. Skilurðu mig?

Málið er nefnilega að ef þú ferð á stefnumót og kynnist nýju fólki, þá þarftu að sætta þig við það eins og það er. Það er erfitt að ætla að finna einstakling og síðan breyta honum eftir eigin höfði. Sem dæmi, ef maður stefnir á að fara í samband sem er ekki meðvirkt getur maður ekki farið á stefnumót með ljóshærðum einstaklingi, setið síðan á móti honum og  „fantaserað“ um hvað þetta væri frábært væri hárið rautt og hún með smá brúnkukrem.  

Konan sem þú virðist elska í dag er gift, það er staðan og þú ættir ekki að reyna að stjórna því. Ef þú raunverulega elskar hana, þá gefur þú henni svigrúm til að gera hlutina heiðarlega gagnvart öllum í kringum sig, sér í lagi börnunum. Ferð að vinna aðeins í þér og sérð eftir þá vinnu hvort þetta er raunverulega sambandið sem þig langar í. 

Góður tími í fráhald væri 3-4 vikur þar sem þú ert ekki í neinu sambandi við hana eða aðrar konur á meðan þú skoðar gildin þín, hver þú vilt verða, topp- og botnhegðun í þessu samhengi og svo framvegis.

Ég myndi alltaf segja að það taki fólk 3 ár að jafna sig eftir skilnað, venja börnin við nýjar aðstæður og þar fram eftir götunum. Nokkrir mánuðir, eða jafnvel nokkur ár er ekki langur tími ef fólk ætlar að eyða restinni af lífinu saman. Ekki satt?

Ef við myndum vinna flott sjálfsvirðingaverkefni saman, værir þú kominn á þann stað eftir nokkrar vikur að treysta þér til að setja kærleiksrík mörk. Setja sjálfan þig í fyrsta sætið og fara inn í hvern dag með heiðarleika, auðmýkt og kraft að vopni. Þú ert þess virði og lífið svo sannarlega meira spennandi þannig. Því get ég lofað. En ég myndi ekki reyna að fara í þessa vinnu einn. Þú þarft handleiðslu. Fullt af sérfræðingum eru góðir í slíku.

Gangi þér vel.

Kærar Elínrós Líndal. 

Ligg­ur þér eitt­hvað á hjarta? Þú get­ur sent El­ín­rós spurn­ingu HÉR. 

Tengdar fréttir

Elínrós Líndal einstaklings-og fjölskylduráðgjafi

Keypti hús með manni sem er ruddalegur við dæturnar - hvað er til ráða?

• Hvar eru allir mennirnir sem eru um 60 ára?
• Hann gefur mér ekki einu sinni afmælisgjöf
• Kærastan hélt framhjá með besta vini - hvað er til ráða?
• Kærastan gargar í hvert skipti sem hún biður hann um eitthvað

» Fleiri tengdar fréttir

• Blogga um frétt