Jakob Birgisson og Jóhann Alfreð frumsýndu uppistand sitt í Tjarnarbíó um helgina. Þar fara þeir yfir almennt dægurþras í bland við sögur úr eigin lífi. Anna Þóra Björnsdóttir uppistandari og eigandi Sjáðu lét sig ekki vanta en hún er alltaf þar sem mesta stuðið er hverju sinni.
Jakob Birgisson kom sem stormsveipur fram á sjónarsviðið síðastliðið haust með frumraun sinni, sýningunni Meistari Jakob sem um tvö þúsund gestir sóttu. Síðan þá hefur Jakob haft gamanmál að atvinnu og skemmt fólki um land allt. Jakob skrifar um þessar mundir Áramótaskaupið 2019.
Jóhann Alfreð hefur skemmt stórum hluta þjóðarinnar í yfir tíu ár með uppistandshópnum Mið-Íslandi en sýningar hópsins eru orðnar hátt í fimmta hundruð talsins.