Leikkonan Edda Björgvinsdóttir og Salka Sól Eyfeld voru geislandi glaðar og kátar á frumsýningu Sex í sveit í gærkvöldi. Sýningin er sýnd í Borgarleikhúsinu. Sýningin er ekkert venjulegt stykki en þar eiga sex leikarar algeran stjörnuleik.

Jörundur Ragnarsson leikur óheiðarlegan uppa í Gucci-fötum sem er búinn að koma sér upp kornungri hjákonu. Hjákonan er ljóshærð og leggjalöng og er leikin af Völu Kristínu Eiríksdóttur. Eiginkonan er leikin af Sólveigu Guðmundsdóttur sem er alls ekki öll þar sem hún er séð og Sigurður Þór Óskarsson leikur Ragnar sem er 35 ára fráskilinn endurskoðandi.

Katrín Halldóra Sigurðardóttir, sem sló í gegn í Ellý, sýnir á sér allt aðra hlið í sýningunni. Svo er það óvæntasta innkoma kvöldsins en hún var í boði Haraldar Ara Stefánssonar. 

Á frumsýningunni skemmti fólk sér einstaklega vel og var mikið hlegið.