Sigurbjörn Magnússon lögmaður hélt upp á sextíu ára afmæli sitt á dögunum. Veislan fór fram í sumarbústað fjölskyldunnar, Brekkuskála, sem er í landi Kiðafells í Kjós. Boðið var upp á heiðarlegar veitingar og svo héldu Björn Kristinsson, Bjössi sax, og hljómsveit uppi stuðinu.
Þetta er ekki í fyrsta skipti sem haldið er upp á sextugsafmæli í bústaðnum því afi hans hélt upp á sitt sextugsafmæli 1945.
„Afi, Sigurbjörn Þorkelsson sem oft var kenndur við Vísi, kaupir þessa jörð 1938 og byggir þennan sumarbústað 1941. Hann hélt upp á sextugsafmæli sitt þarna 1945,“ segir Sigurbjörn sem síðar eignaðist bústaðinn og hefur endurbætt hann að mestu leyti í upprunalegri mynd.
Þegar Sigurbjörn er spurður að því hvort hann sé mikið afmælisbarn játar hann því.
„Ég er mikið afmælisbarn, en það er kannski vegna þess að ég er einkabarn. Foreldrar mínir höfðu alltaf töluvert fyrir afmælinu mínu þegar ég var barn en auk þess sem það bar upp á sama dag og afmæli föðurömmu minnar, Helgu Jónsdóttur. Við héldum stundum upp á afmælið saman og ég minnist mjög margra afmælisdaga á þessum stað í Brekkuskála,“ segir hann.
Í afmælinu var meðal annars boðið upp á pylsur frá Bæjarins bestu og með því en þessi þjóðarréttur Íslendinga er í miklu uppáhaldi hjá afmælisbarninu.
„Ég rak lögmannsstofu í Eymundsson húsinu niður í Austurstræti og þá var hádegisverðurinn oft pylsa og kók á Bæjarins bestu. Ég hef alltaf taugar til þess og hef gert þetta áður í veislum. Það að bjóða upp á Bæjarins bestu hefur alltaf mælst vel fyrir,“ segir hann.
-Fékkstu eitthvað fallegt í afmælisgjöf?
„Ég fékk nýjan hnakk en ég er með hestana mína þarna á Kiðafelli og hef gert það síðustu 40 árin. Ég er einmitt að fara í hestaferð eftir helgi með góðum hópi.“