Smartland Mörtu Maríu | Samkvæmislífið | mbl | 22.6.2018 | 23:30

Stelpa breytir leikjasenunni

Margrét Sigurðardóttir er að taka sér stöðu innan leikjasenunnar um þessar mundir. Ljósmynd/Aðsend

Það þarf sterk bein til að vera kvenfrumkvöðull og án efa sterkari bein ef þú ætlar að sigra í tölvuleikjaiðnaðinum. Margrét Sigurðardóttir annar stofnenda Mussila er að ryðja brautina með nýjum samningi við Google og Musical Futures. Hilmar Þór Birgisson er hinn stofnandi Mussila sem hefur nú 200.000 notendur víða um heiminn. Leikurinn hefur hlotið að meðaltali 5 stjörnur, bæði frá notendum App Store og Google Play og náð fyrsta sæti í sínum flokki í 17 löndum.

Í gær var haldinn sumarfögnuður fyrirtækisins Rosamosa. Ástæða samkomunnar var að fagna árangri síðustu mánaða og kynna hluthöfum og samstarfsaðilum næstu skref.

Jón Gunnar Þórðarson, Andri Snær Magnason, Kristján Kristjánsson, Margrét Helga Erlingsdóttir, Þórunn R. Þórarinssdóttir Ljósmynd/Aðsend

Leikurinn hefur hlotið einróma lof gagnrýnenda og hefur m.a. verið valinn á lista yfir bestu leiki ársins 2017 á vefsíðunni Teachers with apps. Nordic Startup gaf Margréti Sigurðardóttur, framkvæmdastjóra Rosamosa, nafnbótina frumkvöðull ársins árið 2017 og samtökin Global women innovators and inventors network veittu henni platínuverðlaun á sviði menntunar og rannsókna.

Daði tónlistarmaður á samkonu Rosamosa í gær. Ljósmynd/Aðsend

Tækniþróunarsjóður Íslands veitti fyrirtækinu á dögunum vaxtarstyrk fyrir verkefnið Mussila-skólinn, styrkurinn gefur fyrirtækinu svigrúm til þess að vinna að næstu skrefum sem eru bæði spennandi og krefjandi.

Hvernig er að vera kona að setja á laggirnar tölvuleikjafyrirtæki?

„Ég var satt að segja ekkert að spá í það þegar ég stofnaði fyrirtækið - var bara drifin af áhuga á því sem ég var að gera, hafði í raun lítið spilað tölvuleiki en sá þarna leið til að leysa vandamál í tónlistarkennslu - þar sem komið er til móts við þarfir og menningarheim nútímabarna og tæknin nýtt til góðs.

Svo áttaði ég mig á því bara löngu síðar að ég var ein af örfáum konum sem höfðu tekið þetta skref og á tímabili var ég sú eina á landinu sem stýrði fyrirtæki sem var eingöngu í tölvuleikjaframleiðslu. Það eru hins vegar mikil tækifæri fyrir konur á þessum markaði sem hefur verið mjög karllægur og efnistökin eftir því. Það á sem sagt eftir að gera alla tölvuleikina sem snúa að áhugamálum og hugarheimi kvenna.“

Hafa viðtökurnar verið eins og fyrir strákana?

„Já, ég hef ekki fundið neitt sérstaklega fyrir því að það hafi verið munur á viðtökunum - ef eitthvað er þá hefur það hjálpað frekar en hitt. Sérstaða er alltaf kostur.“

Hverju þakkar þú velgengni Mussila?

„Það er annars vegar tímasetningin - en það er mjög mikill vöxtur á sviði fræðandi tölvuleikja þessa dagana - og hins vegar það að ég er með frábært framleiðsluteymi og við vöndum okkur við allt. Þar að auki hafa þróunarstyrkir Tækniþróunarsjóðs og framlag fjárfesta gert okkur kleift að framleiða mikið, þróa og verða þannig alltaf og mjög hratt betri og betri og leikirnir eru núna frá þessu litla teymi orðnir alveg sambærilegir við það besta á markaði.

En það mikilvægasta kannski er að við erum með mikilvægt markmið sem snertir flesta og það er að breiða út boðskap tónlistarinnar, gera öllum kleift að læra að tónlist - og ég held að flestir finni mjög sterkan samhljóm með þessu. Tónlistin bætir heiminn og okkur sjálf, það er eitthvað sem allir vilja og tengja við.“

Hilmar Þór Birgisson annar stofnenda Rosamosa ehf Ljósmynd/Aðsend

Mussila skólinn

Fyrirtækið Rosamosi og samtökin Musical Futures gerðu á dögunum samstarfssamning. Musical Futures eru samtök kennara sem nýta tónlistarkennslu í námi og gengur út á endurmenntun kennara sem þeir nýta sér nýjustu kennsluaðferðirnar hverju sinni. Musical Futures ætlar að þróa kennsluaðferðir fyrir kennara og foreldra í samstarfi við Rosamosa til að kenna börnum tónfræði í gegnum smáforritið Mussila. Þann 29. júní mun Anna Gower frá Musical Futures kynna verkefnið fyrir 150 kennurum í Ástralíu. Í kjölfarið verða haldin kennslu-námskeið í Ástralíu og víðar í Asíu fyrir áramót.

Google-fjölskyldurýmið

Í vikunni tilkynnti Google að Mussila hefði verið valið til að vera kynnt í sérstöku fjölskyldurými (Family Link) sem Google var að opna. Fjölskyldurýmið er öruggt svæði fyrir börn til þess að vafra á netinu, foreldrar geta fylgst með vefnotkun barna sinna og þar er lögð sérstök áhersla á að efnið sem þar er í boði sé bæði fjölskylduvænt og fræðandi. Mussila-leikurinn er þar efstur á síðunni og Google mælir sérstaklega með leiknum fyrir foreldra til að kynna börnunum sínum. Fjölskyldurýmið hjá Google er í boði í 33 löndum, því miður er Ísland ekki þar á meðal.