Flugfélagið Icelandair og sendiráð Íslands í Berlín efndu til teitis í tilefni af flugi félagsins til Berlínar sem hófst í byrjun nóvember. Einnig var 80 ára afmæli flugfélagsins fagnað. Um það bil 100 manns létu sjá sig í boðinu en á meðal gesta var Stefan Seibert, sem er blaðafulltrúi þýsku ríkisstjórnarinnar og hægri hönd Angelu Merkel kanslara.
Boðið var upp á góðar veitingar í boðinu og var það Stefán Viðarsson, kokkur hjá Icelandair-hótelunum, sem matreiddi ofan í gestina. Kristjana Arngrímsdóttir söngkona og Kristján Eldjárn, sem gerðu garðinn frægan með Tjarnarkvartettinum á sínum tíma, fluttu íslensk þjóðlög og rímur og Emil Þór Sigurðsson sýndi magnaðar Íslandsmyndir.
Arthúr Björgvin Bollason, kynningar- og markaðsfulltrúi Icelandair í Þýskalandi, var veislustjóri. Eins og sjá má á myndunum var stuð og stemning á mannskapnum.