Við Drápuhlíð í Reykjavík hefur fjölskylda búið sér afar fallegt heimili. Íbúðin er 125 fm að stærð en húsið sjálft var byggt 1950. Eins og eitthvert gáfumennið sagði þá er ekki þverfótað fyrir smekklegheitum í þessari heillandi íbúð.
Búið er að hressa íbúðina töluvert við með nýju eldhúsi sem er opið inn í borðstofu sem síðan tengist stofu. Heildarmynd íbúðarinnar er sönn og falleg og þar er að finna mörg smáatriði sem gera íbúðina einstaklega sjarmerandi.
Í eldhúsinu er hvít sprautulökkuð innrétting og eru veggir málaðir í hólf og gólf og tónar grái liturinn vel við húsgögn og innréttingu.
Gott flæði er í íbúðinni og er fagurfræði í forgrunni í hverju einasta horni.