Tóku frumskógarþemað alla leið

Besku systurnar Cara og Poppy Delevingne eru heimsfrægar fyrir fyrirsætustörf sín. Þrátt fyrir að eiga nóg af peningum og vera orðnar 26 og 33 ára ákváðu þær að búa saman í Los Angeles. Hönnunartímaritið Architectural Digest heimsótti systurnar.

Heimili systranna í Los Angeles er ævintýri líkast en þær fengu arkitektinn Nicolò Bini til þess að taka húsið í gegn með sér. Í myndbandi sem birtist með greininni segja þær að þemað sé frumskógur og það fer ekki á milli mála. Grænir litir, bambus og plöntur hafur verið vinsælt í innanhúshönnun undanfarin misseri og hér er þessi tíska tekin alla leið.  

Grænir veggir, veggfóður með laufblöðum, græn húsgögn, grænar flísar og grænar plöntur gera mikið fyrir frumskógarþemað. Basthúsgögn eru áberandi og í gestaherberginu eru kojur úr bambus þannig að gestum líður líklega eins í safarí-ferð en ekki í heimsókn hjá fyrirsætum í Los Angeles þegar þeir gista. 

Sjón er sögu ríkari og mælir Smartland með því að horfa á myndbandið hér fyrir neðan og kíkja þannig í heimsókn til systranna. 

• Blogga um frétt