Tónlistarfólkið Jón Ólafsson og Hildur Vala Einarsdóttir hafa sett sína fallegu íbúð við Hagamel á sölu. Íbúðin er á efstu hæð með mikilli lofthæð og fallegu útsýni.
Hæðin er 184 fm að stærð og er í húsi sem byggt var 1959. Heimili Jóns og Hildar Völu er vel skipulagt og huggulegt. Tekkið fær að njóta sín í íbúðinni en í þar eru upprunalegar innihurðir og skápar. Búið er að endurnýja íbúðina töluvert. Þar er til dæmis búið að skipta um eldhús og taka baðherbergið í gegn.
Í eldhúsinu er hvít sprautulökkuð innrétting, fallegar hvítar flísar á milli skápa og góður eldhúskrókur. Það sem vekur athygli er að þvottavélin er í eldhúsinu sem er afar hentugt á stóru heimili.
Blái liturinn fær að njóta sín á nokkrum veggjum og skapar hann bæði hlýleika og mýkt.
Eins og sést á myndunum eru Jón og Hildur Vala smekklegt fólk.