Ólafur Jóhann Ólafsson einn ástsælasti rithöfundur þjóðarinnar virðist vera lítið fyrir svart leður, stál, gler og spegla ef marka má heimaskrifstofur hans á Íslandi og í Bandaríkjunum. Hann kýs hlýleika, listaverk, þægilega skrifborðsstóla og fallega lampa.
Nýjasta bók hans, Sakramentið, hefur slegið algerlega í gegn og fengið framúrskarandi dóma. Hún hefur líka verið að gera góða hluti á metsölulista Eymundsson.
En hvar skrifaði Ólafur Jóhann bókina?
Smartland fór á stúfana og fékk myndir af skrifstofum Ólafs Jóhanns á Íslandi og í Bandaríkjunum. Það kemur í ljós þegar skrifstofur Ólafs Jóhanns eru skoðaðar að hann er þessi hlýlega og notalega heimilistýpa. Í kringum hann eru bækur og skrautmunir, ekki svart, stál, speglar og marmari eins og er svo vinsælt hjá greifum sem halda að þeir séu betri en hinir.
Ólafur Jóhann á fallegt hús við Freyjugötu í Reykjavík. Þar situr hann við skriftir á sumrin og í jólafríum en alla jafna skrifar hann á heimili sínu á Manhattan. Þegar hann er ekki þar við skriftir dvelur fjölskyldan í gamla hvalveiðiþorpinu Sag Harbor sem er yst á Long Island.