Anna Einarsdóttir framkvæmdastjóri í Sportstöðinni á Selfossi hellti sér út í fitness fyrir rúmlega ári síðan og varð í 2. sæti á Íslandsmótinu í fitness. Smartland hafði samband við Önnu, sem er þriggja barna móðir, og spurði hana hvernig hún hafi náð þessum árangri. „Ég hafði samband við einkaþjálfara og fór strax að lyfta skipulega í fjarþjálfun. Ég tók mataræðið í gegn og byrjaði að lyfta 6 sinnum í viku. Ég er stanslaust að reyna að stækka mig. 3 svar í viku tek ég neðri hluta líkamans og 2 svar tek ég axlir og hendur og bak einu sinni í viku. Ég æfi kviðvöðvana annan hvern dag,“ segir Anna. 

Þegar Anna er spurð út í mataræði sitt segist hún borða eins hreinan mat og kostur gefst. „Ég borða alltaf á tveggja tíma fresti og hef matinn próteinríkan. Ég vel hreina fæðu og borða til dæmis mikið af hafragraut, skyri, grænmeti, ávöxtum, kjúklingi, hýðishrísgrjónum og fiski,“ segir hún og játar að drekka helst bara vatn og einstaka sinnum kaffi.