Fjártæknifyrirtækið Kríta gekk frá fjögurra milljarða króna fjármögnunarsamningi við evrópska sjóðinn Win Yield General Partners fyrir sex mánuðum.

Stefán Jökull Stefánsson, stjórnarformaður Kríta, segir í tilkynningu að útlán Kríta hafi þrefaldast: 

„Til að mæta þessum vexti höfum við þurft að endurskipuleggja margt innanhús, ráða fleira starfsfólk, fínstilla ferla, skerpa á tækninni og hraða ákvarðanatöku. Við erum lítið fjártæknifyrirtæki í tjörn með rótgrónum fjármálastofnunum og sem vinnur ekki alltaf slaginn um lægsta verðið, en einsetjum okkur að vera sterk í hraða, þægindum og þjónustu," er haft eftir Stefáni.

Stefán bendir sömuleiðis á að það sé augljóst að lítil nýsköpun hefur átt sér stað í lánaþjónustu til fyrirtækja.

„Við erum því með fleiri nýjar vörur í lánaþjónustu í farvatninu sem eru í þróun og fara á markað síðar í haust. Það verður spennandi að sjá hvernig markaðurinn tekur við því."