Allar líkur eru á að Jonas Gahr Støre, leiðtogi Verkamannaflokksins í Noregi, megi búa sig undir fjögur ár til viðbótar í forsætisráðherrabústaðnum, skrifar norska dagblaðið VG nú þegar þrír fjórðu hlutar atkvæða hafa verið taldir í þingkosningunum í Noregi.
Miðað við stöðuna að þeim töldum hefur Verkamannaflokkurinn 28 prósent atkvæða sem er nokkru meira en þau 27,1 prósent sem spáð var í síðustu skoðanakönnunum fyrir kosningar.
Framfaraflokkurinn með sögulegt fylgi
Þá stefnir Framfaraflokkurinn í bestu kosningaúrslit í sinni sögu með 24,8 prósent talinna atkvæða, nokkuð yfir stöðunni í síðustu könnun sem gaf flokknum innan við 22 prósent.
Þrátt fyrir þetta stefnir ekki í að hægriflokkarnir standi með pálmann í höndunum að öllum atkvæðum töldum þar sem Hægriflokkur Ernu Solberg er nánast í frjálsu falli með 14,2 prósent atkvæða sem er 6,1 prósentustigi undir útkomu síðustu kosninga og versta kosning flokksins í tvo áratugi.