Lögreglunni á höfuðborgarsvæðinu barst í dag tilkynning um rifrildi fyrir utan íbúðarblokk í Breiðholti.

Í tilkynningunni kom fram að annar aðilinn hefði verið með hníf en þegar lögregla mætti á vettvang reyndist svo ekki vera.

Þetta kemur fram í dagbók Lögreglunnar á höfuðborgarsvæðinu.

Einnig var tilkynnt um innbrot í Skerjafirðinum á svæði lögreglustöðvar 1 sem annast eftirlit í Austurbæ, Miðbæ, Vesturbæ og á Seltjarnarnesi.

Á sama svæði voru afskipti höfð af ökumanni sem ók undir áhrifum fíkniefna. Ökumaðurinn reyndist einnig bráðabirgðasviptur en var laus úr haldi lögreglu að blóðsýnatöku lokinni.

Hjólaði á kyrrstæðan bíl

Þá hjólaði reiðhjólamaður á kyrrstæða bifreið án tjóns og umferðaróhapp varð í Múlahverfi, einnig án slysa.

Í Hafnarfirði, Garðabæ og á Álftanesi voru ökumenn stöðvaðir fyrir akstur án bílnúmera að framan og fyrir að aka undir áhrifum fíkniefna eða lyfja.

Tvö ökutæki voru boðuð í skoðun vegna vanrækslu á skoðunarskyldu.