Framlag til Fæðingar­orlofssjóðs verður hækkað um 1,8 milljarða til að mæta ákvæði í kjarasamningum frá árinu 2024 um hækkun hámarkgreiðslu úr sjóðnum úr 800.000 kr. á mánuði í 900.000 kr., auk þess sem tekið er tillit til spár Hagstofu Íslands um fæðingar barna og þróun meðaltekna.

Þetta kemur fram í fjárlagafrumvarpi næsta árs. 

Þar segir jafnframt að umönnun barna hafi sögulega hvílt þyngra á herðum mæðra og því geti vistun barna með fjölþættan vanda létt álagi af fjölskyldum, ekki síst mæðrum.

„Hækkun á hámarksgreiðslum fæðingarorlofs bætir afkomu foreldra í fæðingarorlofi, þar sem konur taka að meðaltali lengra orlof en karlar. Þá er ráðstöfunin talin líkleg til að stuðla að aukinni nýtingu feðra á rétti sínum til fæðingarorlofs og þar með jafnari skiptingu á umönnun barna,“ segir í frumvarpinu.