Framlög til utanríkismála og alþjóðlegrar þróunarsamvinnu hækka um 5 milljarða að raunvirði frá fjárlögum fyrra árs, eða sem nemur 14,5%, og hækka því hlutfallslega mest allra málefnasviða. Hækkar fjárveiting vegna varnartengdra verkefna um rúma 3,3 milljarða m.a. til að standa við skuldbindingar um varnartengdan stuðning við Úkraínu.
Þetta kemur fram í fjárlagafrumvarpi næsta árs.
Þar segir að fjárveitingin endurspegli breyttar aðstæður í alþjóðamálum og aukið vægi öryggis- og varnarmála en á leiðtogafundi NATO í júní hafi verið ákveðið að stórauka framlög til varnarmála og varnartengdra verkefna sem styðji við áfallaþol, öryggi og varnir.
Flest gagnist Íslendingum beint eða óbeint
„Viðmiðið er að bandalagsþjóðirnar hafi náð því markmiði að veita 1,5% af VLF til varnartengdra verkefna eigi síðar en árið 2035. Meðal verkefna sem gert er ráð fyrir að falli undir varnartengd verkefni eru ýmiss konar innviðir, s.s. samgöngumannvirki, netöryggi, löggæsla, landhelgisgæsla og eftirlit á landamærum. Líklegt er að flest af þessu gagnist Íslendingum sjálfum beint eða óbeint,“ segir í frumvarpinu.
Tekið er fram að nákvæm greining á þeim verkefnum sem fallið geti undir varnartengd verkefni liggi ekki fyrir en gera megi ráð fyrir að einhver verkefni sem nú þegar hafi samþykktar fjárveitingar í fjárlögum og fjármálaáætlun geti fallið þar undir. Skýrari mynd af þeim verkefnum verði ljós þegar viðmið NATO verða birt.
Ætlað að draga úr neikvæðum áhrifum stríðsins á jafnrétti
„Auknum framlögum til Úkraínu er ætlað að styðja við fullveldi, friðhelgi landamæra, öryggi borgara, mannúðaraðstoð og uppbyggingarstarf í Úkraínu. Það mun draga úr neikvæðum áhrifum stríðsins á jafnrétti og/eða stuðla að jafnrétti. Vopnuð átök líkt og þau í Úkraínu hafa ólík áhrif á konur og karla og vísbendingar eru um að konur verði frekar fyrir fjölþættum áhrifum innrásarinnar en herskyldan hafi áhrif á karla. Aftur á móti verður ekki séð að efling viðbúnaðargetu Íslands, sem ætlað er að treysta varnir lands og þjóðar, gagnist einu kyni framar öðru,“ segir í frumvarpinu.