El­ín­rós Lín­dal fjöl­skylduráðgjafi svar­ar spurn­ing­um les­enda Smart­lands. Hér fær hún spurn­ingu frá konu sem á erfiða tengdamóður. Hvað er best fyrir hana að gera tengt því?

Sæl.

Hvaða ráð áttu fyrir mig tengt stjórnsamri tengdamóður? Ég hitti manninn minn fyrir rúmum fimm árum og allt gekk vel hjá okkur þar til við giftum okkur og byrjuðum að eignast börn.

Móðir mannsins er að gera mig brjálaða. Hún er með skoðun á öllu og engu og er sífellt að gagnrýna mig. Hún vill að ég sinni barnauppeldinu eins og gert var fyrir þrjátíu árum þegar hún var með ung börn – en ég vil alls ekki vera ósanngjörn, en það eina sem hún hefur kennt börnum sínum er undanlátsemi og óheiðarleiki gagnvart henni. 

Ef ég reyni að henda einhverjum setningum fram þegar hún er að gefa mér óumbeðin ráð þá hækkar hún bara röddina og nánast gargar á mig.

Á hennar heimili þá er það hún sem ræður. Maðurinn hennar er eins og rasskeltur api og það sitja allir og standa í kringum hana. Ég get ekki hugsað mér svona heimilishald, en ég er alveg lens þegar kemur að leiðum til að reyna að stoppa hana af. Hún er algjörlega stjórnlaus! Áttu ráð fyrir mig?

Kveðja, 

LL

Sæl. 

Af lýsingu þinni að dæma ertu í aðstæðum sem valda mikilli spennu og óöryggi í fjölskyldulífinu. Það sem þú ert að lýsa eins og gagnrýni, óumbeðin ráð og valdníðsla í fjölskyldusamhengi er dæmigerður vandi sem getur haft veruleg áhrif á hjónaband og sjálfsvirðingu. 

Í minni reynslu sem ráðgjafi sé ég þrjú atriði sem skipta máli hér:

Raunhæfar væntingar: Það er ekki líklegt að tengdamóðir breytist í grundvallaratriðum. Þú getur hins vegar stillt þínar væntingar og ákveðið mörk.

Stuðningur frá maka: Maðurinn þinn þarf að vera skýr um að standa með þér þegar erfið samskipti koma upp. Ef hann dregur sig í hlé eða verður undanlátsamur, þá eykst vandinn.

Mörk og samskipti: Það er mikilvægt að þú sért með góð og skýr mörk og látir heyra í þér þegar þér er sýnd óvirðing. Það getur þýtt að láta ekkert liggja á milli hluta, svara og leiðrétta þegar talað er um eitthvað sem á ekki erindi við raunveruleikann, að draga úr samveru eða setja reglur um samskiptin.

Næstu skref sem ég mæli með:

Taktu samtal við manninn þinn þar sem þú útskýrir hversu mikilvægt það er að hann standi með þér.

Íhugaðu að fá utan­aðkomandi sérfræðing til að vinna með ykkur sem par, svo hann sjái hlutverk sitt í nýju ljósi.

Lækkaðu væntingar til tengdamóðurinnar sjálfrar – reyndu að sjá hana sem fyrirsjáanlega og óbreytanlega í sínu mynstri, frekar en verkefni sem þú getur „lagfært“.

Að lokum: 

Það sem þú getur stjórnað er hvernig þú bregst við – ekki hvernig hún hagar sér. Með skýrum mörkum og stuðningi frá maka geturðu skapað meira öryggi fyrir þig og börnin, óháð hegðun tengdamóðurinnar.

Ég sendi þér mín­ar bestu kveðjur, El­ín­rós. 

Ligg­ur þér eitt­hvað á hjarta? Þú get­ur sent El­ín­rós spurn­ingu HÉR.