Ferðamaður, sem fannst eftir skamma leit í krefjandi landslagi í Öræfum á föstudagskvöld, reyndist vera látinn. Hann var 19 ára gamall.
Þetta kemur fram í tilkynningu frá lögreglunni á Suðurlandi.
Einar Sigurjónsson, varðstjóri hjá lögreglunni á Suðurlandi, sagði í samtali við mbl.is í gær, að tilkynnt hefði verið um ferðamann sem hafði ekki skilað sér heim úr gönguferð um tíuleytið í gærkvöldi.
„Þá hafði fólk áhyggjur af honum, að eitthvað hefði komið fyrir,“ er haft eftir Einari úr frétt mbl.is síðan í gær. Einstaklingurinn hefði svo fundist í Öræfum upp úr miðnætti og verið fluttur af vettvangi.
https://www.mbl.is/frettir/innlent/2025/07/05/ferdamadurinn_er_fundinn/
Hafði farið í göngu við Svínafell
Aðstoðarbeiðni barst lögreglu um kl. 22 á föstudagskvöld frá erlendum ferðamönnum sem dvöldu í Öræfum.
Þeir óskuðu eftir aðstoð við leit að 19 ára samferðamanni sem hafði farið í göngu við Svínafell og ekki komið til baka innan eðlilegra tímamarka miðað við áætlun.
Björgunarsveit í Öræfum var þegar í stað kölluð út til leitar sem og þyrla Landhelgisgæslunnar. Þyrluáhöfn landhelgisgæslu og björgunarsveitarfólk fluttu hinn látna af vettvangi.
Í tilkynningu segir að lögreglan á Suðurlandi hafi atvikið til rannsóknar en að ekkert hafi komið fram sem bendi til annars en að maðurinn hafi látist af slysförum.