Þyrla Landhelgisgæslunnar var send út um miðnætti í gær til að aðstoða lögregluna á Suðurlandi við leit að ferðamanni í Öræfum.
Auðunn F. Kristinsson, framkvæmdastjóri aðgerðarsviðs Landhelgisgæslunnar, segir í samtali við mbl.is að ferðamaðurinn sé fundinn.
Ferðamaðurinn skilaði sér ekki úr gönguferð
Að sögn Einars Sigurjónssonar, varðstjóra hjá lögreglunni á Suðurlandi, var tilkynnt um ferðamann sem hafði ekki skilað sér heim úr gönguferð um tíu leytið í gærkvöldi, „þá hafði fólk áhyggjur af honum, að eitthvað hefði komið fyrir.“
Í kjölfarið hefði verið sett í gang leit og meðal annars kölluð til þyrla Landhelgisgæslunnar.
Einstaklingurinn hefði svo fundist í Öræfum upp úr miðnætti og verið fluttur af vettvangi.
Ekki sé unnt að veita upplýsingar um líðan hans að svo stöddu.