Skammt frá iðandi mannlífi í Barselóna leynist Begur, miðaldabær á Costa Brava-ströndinni. Bærinn býður upp á sögu, ró og fallegar strandir.

Þótt Begur standi ekki beint við sjávarsíðuna er hann aðeins í um tveimur kílómetrum frá fallegustu víkum Spánar. Þar má njóta sólarinnar, synda, kafa eða róa um á kajak.

Það tekur aðeins um eina og hálfa klukkustund að aka til Begur frá Barselóna en einnig er hægt að taka rútu þangað daglega yfir sumartímann. Einnig er hægt að taka lest til Girona og þaðan rútu til Begur.

Bær með sál og sögu

Begur stendur á hæð innan um gamlan kastala sem gnæfir yfir svæðinu. Útsýnið er ólýsanlegt og má sjá til Medes-eyja og jafnvel Pýreneafjallanna í góðu skyggni. Steinlagðar götur, litrík hús og verslanir einkenna bæinn.

Bærinn er með mikla sögu en á 19. öld fluttu margir íbúar Begur til Kúbu í von um að öðlast betra líf. Þeir sem sneru til baka byggðu stórhýsi í nýlendustíl sem setur svip sinn á bæinn. Í september ár hvert er þessi tenging við Kúbu heiðruð á hátíðinni Fira d' Indians, þar sem suðuramerísk tónlist og vörur taka yfir bæjarlífið.

Skemmtilegar gönguleiðir og afþreying

Ef göngur og fallegar strandir kalla á þig, þá er Begur rétti staðurinn. Tvær vinsælar gönguleiðir liggja meðfram strandlengjunni. Þar eru afskekktar víkur, klettar, litlar snekkjur og tækifæri til að kafa og skoða lífið neðansjávar.

Leiðin frá Aiguablava til Sa Tuna er sérstaklega falleg. Gengið er meðfram skógum og klettum með útsýni yfir hafið og fallegar strandir. Fyrir þá sem kjósa frekar að vera á ströndinni er skemmtilegt að heimsækja Illa Roja sem er rauðklettaströnd þar sem náttúrufegurðin ræður ríkjum.

Begur er einnig frábær staður til að prófa nýja hluti. Þar má leigja kajak eða brimbretti og kynnast þannig strandlengjunni betur á eigin forsendum. Fjöldi veitingastaða er í bænum en veitingastaðurinn Casa Juanita býður upp á sjávarrétti í hæsta gæðaflokki. Fitzroy Café er vinsælasta kaffihús bæjarins sem býður upp á bananapönnukökur og kombucha.

Best er að heimsækja Begur á vorin eða á haustin þar sem veðrið er milt og gott á þessum tíma. Á sumrin fjölgar ferðamönnum og bærinn iðar af lífi.