Samfélagsmiðlastjarnan Ágúst Beinteinn Ágústsson, eða Gústi B. eins og hann er kallaður, mun stíga á svið á morgun þegar hann mun fara með hlutverk græna banana í Ávaxtakörfunni. Tónlistarmaðurinn og leikarinn, Kristinn Óli eða Króli eins og hann er kallaður, er vant við látinn og því tekur Gústi B. við keflinu. Þótt Gústi B. sé þekktur í seinni tíð sem TikTok-stjarna og umsjónarmaður hlaðvarpsins Veislunnar þá hefur hann margoft stigið á svið. Þegar hann var 12 ára fékk hann hlutverk í Óvitum sem sýnt var í Þjóðleikhúsinu. Í framhaldinu lék hann í Borgarleikhúsinu, Gaflaraleikhúsinu og í útvarpsleikhúsinu á Rúv. 

Ávaxtakarfan er sýnd í Hörpu. Þorsteinn Stephensen tónleikahaldari framleiðir sýninguna. 

Við hlið Gústa B. verður Katrín Mist Haraldsdóttir sem er leikkona, danshöfundur og dansari. Hún hefur leikið í nokkrum sýningum sem slegið hafa í gegn eins og Matthildi og Níu lífum Bubba. Auk þess fór hún með hlutverk í Skjaldmeyjum hafsins. 

Þá bætist leikarinn Bjarni Kristbjörnsson einnig við hópinn en hann hefur starfað bæði í Borgarleikhúsinu og Þjóðleikhúsinu. Hann vakti sérstaka athygli þegar hann fór með hlutverk Billy Elliot þegar hann var 12 ára gamall.

Chantelle Carey er danshöfundur ávaxtanna í Ávaxtakörfunni og mun sjá til þess að þeir verði enn glæsilegri en áður. Þorsteinn Stephensen er spenntur: 

„Þetta verður glæsilegt og ferskt,“ segir Þorsteinn og bætir við: 

„Með því að fá ungt og ferskt fólk inn bætum við skemmtilegu hlýju við sýninguna, sem takmarkar ekki upprunalegu hugmyndina heldur byggir ofan á hana.“