Ný verðmats- og greiningarskýrsla frá ráðgjafarfyrirtækinu Akki metur verð á hlutabréfum fjarskiptafélagsins Nova á 7,32 krónur, en gengi bréfa félagsins á markaði í gær var undir 5 kr. á hlut. Mat Akks er því yfir 50% hærra en núverandi gengi bréfa félagsins.
Skýrslan, sem byggir á sjóðstreymismati og ítarlegri greiningu á fjárhag og framtíðarforsendum félagsins gefur til kynna að frjálst sjóðstreymi næstu fjögur ár muni nema yfir 60% af núverandi markaðsvirði félagsins.
Nefnt er að félagið búi yfir sterkum rekstrargrunni með stöðugum tekjustofnum, vaxandi EBITDA-framlegð og öflugum innviðum. EBITDA án söluhagnaðar hefur vaxið úr 2,4 milljörðum árið 2018 í yfir 4,1 milljarð árið 2024, sem jafngildir árlegum vexti upp á 9,6%. EBITDA-hlutfall fyrir árið 2025 er spáð 31,1%. Arðsemi bundins fjármagns (ROIC) er einnig á uppleið og er spáð að ná 18,8% á sama tímabili.
Þrátt fyrir sterka stöðu á fjarskiptamarkaði stendur Nova frammi fyrir áskorunum. Enginn leiðandi fjárfestir er í hluthafahópi og stór hluti fjármuna er bundinn í rekstri sem krefst bættrar arðsemi. Samkeppni á fjarskiptamarkaði er hörð og markaðshlutdeild hefur lítillega dregist saman undanfarið ár, úr 32,4% í 31,9%, með um 188 þúsund farsímaáskrifendur.
Stærsti einstaki eigandi er Birta lífeyrissjóður með 12,4% hlut en engir einkafjárfestar eru meðal 20 stærstu hluthafa. Þá hefur núverandi forstjóri tilkynnt um starfslok, sem vekur spurningar um framtíðar stefnumörkun félagsins.
Greining Akks bendir á að Nova gæti reynst álitlegt yfirtökuskotmark, m.a. vegna stöðugs sjóðstreymis, einfaldrar eignauppbyggingar og fjarskiptainnviða. Auk þess á félagið einn stærsta vildarklúbb landsins, sem er talið vannýtt tækifæri til tekjuaukningar og dýpri tengingar við viðskiptavini.
Í alþjóðlegum samanburði við önnur fjarskiptafyrirtæki er verðlagning Nova hagstæð. EV/EBITDA margfaldarinn fyrir árið 2025 er 6,4x, sem er undir meðaltali bæði evrópskra og íslenskra keppinauta, til samanburðar er hlutfallið 6,7x hjá Símanum og 6,9x hjá Sýn.