Halla Tómasdóttir, forseti Íslands, mun heimsækja Japan 26. maí til 1. júní í tilefni af heimssýningunni EXPO 2025 sem fram fer í Osaka. 

Þetta kemur fram í tilkynningu frá forsetaembættinu. Þar segir að Ísland taki þátt í  samnorrænum sýningarskála á heimssýningunni ásamt Danmörku, Finnlandi, Noregi og Svíþjóð. Megináhersla skálans er að gefa innsýn í lífið í norðri, norræn gildi og náið samband Norðurlandaþjóða við náttúruna.

Þá segir að Halla verði heiðursgestur á þjóðardegi Íslands sem fagnað verður í norræna skálanum þann 29. maí.

Tónlist, bókmenntir og hönnun 

„Yfirskrift dagsins er „Friður og jafnrétti“ og tekur forseti þátt í fjölbreyttri dagskrá þar sem gestum gefst kostur á að upplifa íslenska menningu í gegnum fræðandi samtöl, tónlist, bókmenntir og hönnun.

Samhliða heimssýningunni í Osaka stendur Íslandsstofa fyrir hátíðinni Taste of Iceland í Tókýó dagana 30.-31. maí, þar sem forseti tekur einnig þátt.

Hittir Japanskeisara 

Markmið hátíðarinnar er að kynna íslenska menningu, matargerð og Ísland sem áfangastað fyrir japönskum almenningi og fagfólki.

Á meðan á heimsókninni til Japans stendur fer forseti til fundar við Naruhito Japanskeisara. Þá mun hún eiga fund með Ishiba Shigeru, forsætisráðherra Japans,“ segir í tilkynningu.