Greining KPMG á áhrifum fyrirhugaðrar hækkunar á veiðigjöldum fyrir einstök byggðarlög, bæði sveitarfélögin og atvinnulíf þar, er mikið áhyggjuefni að mati þriggja sveitarstjóra, sem Morgunblaðið ræddi við.
„Við höfum áhyggjur af því að veiðigjöldin verði mismikil milli sveitarfélaga, íþyngjandi fyrir sum sveitarfélög en önnur ekki,“ segir Jón Páll Hreinsson, bæjarstjóri í Bolungarvík.
https://www.mbl.is/frettir/innlent/2025/05/12/veidigjaldafrumvarpi_visad_til_atvinnuveganefndar/
Í því felist ekki andstaða við auðlindagjöld. Þvert á móti ættu fleiri að greiða gjöld fyrir auðlindanýtingu, t.d. á heitu vatni, aðgang að landi og ámóta.
„Við söknum heildstæðrar auðlindastefnu.“
Sigurjón Andrésson, bæjarstjóri á Höfn í Hornafirði, telur að stjórnvöld hafi farið alltof geyst.
„Við hvetjum stjórnvöld til að fara vel yfir þetta í sinni þinglegu meðferð,“ segir hann og bætir við að augljóst sé af niðurstöðum KPMG að undirbúa hefði þurft málið betur og gera slíka greiningu. „Án þess að vera með neina dramatík, þá þarf að staldra við og rýna þetta betur.“
Kristinn Jónasson bæjarstjóri Snæfellsbæjar er sama sinnis.
„Það kom fram í skýrslunni, þegar farið er að rýna þetta, að það er mjög villandi að byggja á meðaltölum. Það er miklu gáfulegra að skoða einstök sveitarfélög, áhrifin á fyrirtækin í þeim og áhrif á sveitarfélögin sjálf.
Nánari umfjöllun má finna í Morgunblaðinu í dag. Einnig má nálgast hana án endurgjalds í Mogganum, nýju appi Morgunblaðsins og mbl.is.