Söngkonan vinsæla Billie Eilish var hvergi sjáanleg á Met Gala í ár, þrátt fyrir að nafn hennar hafi verið á allra vörum á samfélagsmiðlum eftir viðburðinn. Gervigreindar-myndir af söngkonunni á rauða dreglinum vöktu talsverða athygli og urðu tilefni harðrar gagnrýni á klæðnað hennar – sem hún hafði reyndar aldrei klæðst.
Tískuhátíðin Met Gala fór fram í Metropolitan Museum of Art í New York þann 5. maí og að venju létu stjörnurnar ekki sitt eftir liggja þegar kom að tísku og tilþrifum, líkt og fjallað var ítarlega um á Smartlandi á mbl.is.
https://www.mbl.is/smartland/tiska/2025/05/06/best_klaeddu_a_met_gala/
Eilish, sem er 23 ára, var hins vegar stödd á tónleikaferðalagi í Evrópu þetta kvöld og tók því ekki þátt í hátíðinni. Það kom þó ekki í veg fyrir að netheimar fylltust af myndum sem sýndu hana í fjölbreyttum útgáfum af klæðnaði, í samræmi við þema ársins.
Umræðan komst á það stig að Billie sá sig knúna til að stíga fram og leiðrétta málin opinberlega á Instagram. „Fólk að tala um að það sem ég var í á Met Gala hafi verið ömurlegt – ég var ekki einu sinni þarna!“ sagði hún hlæjandi í Instagram Stories.
Söngkonan á bak við ofurhittarann „Birds of a Feather“, sem hefur átt fastan sess á topp 20 lista K100 síðustu mánuði, bætti svo við:
„Þetta eru bara gervigreindarmyndir. Ég var á tónleikum í Evrópu þetta kvöld. Látið mig vera! Ég var ekki einu sinni þarna!“ sagði söngkonan og sló þar líklega tóninn fyrir nýja tíma, þar sem sannleikurinn þarf oftar en áður að heyrast úr fyrstu hendi.
Katy Perry lenti aftur í gervigreindinni
Þetta er ekki í fyrsta sinn sem gervigreind ruglar bæði netverja og jafnvel fjölmiðla þegar kemur að stórviðburðum eins og Met Gala. Í fyrra varð bandaríska söngkonan Katy Perry fyrir því að gervigreind bjó til myndir af henni á rauða dreglinum, þótt hún væri sjálf á tónleikaferðalagi. Perry deildi þá skjáskotum af samskiptum við móður sína, sem var fullviss um að hún hefði mætt í „stórkostlegum kjól“.
Nú í ár endurtók sagan sig að vissu leyti, en aftur fóru gervigreindarmyndir af Katy Perry á flug á samfélagsmiðlum. Í þetta sinn birti Perry sjálf stafræna mynd af sér á Instagram og staðfesti að hún hefði ekki verið viðstödd Met Gala. Hún bætti jafnframt við með léttum tón: „Ég komst ekki á MET, er á The Lifetimes Tour. Í ár var ég með mömmu minni, svo hún slapp við gervigreindina. En ég bið fyrir ykkur hinum.“
Met Gala hefur verið mikilvægur vettvangur fyrir Billie Eilish á undanförnum árum. Hún lét fyrst til sín taka árið 2021, þegar hún mætti í ferskjulitnum Oscar de la Renta-kjól sem vakti mikla athygli, og var þá jafnframt ein fjögurra gestastjórnenda kvöldsins. Árin á eftir sneri hún aftur – árið 2022 í Viktoríustíl frá Gucci og 2023 í svörtum Simone Rocha-kjól með gotneskum blæ til heiðurs Karl Lagerfeld.
Dæmin sýna að gervigreind hefur þegar breytt leikreglum og landslagi í tísku- og afþreyingarheiminum. Myndir af frægu fólki á viðburðum sem það hefur ekki sótt eru orðnar hluti af samfélagsmiðlaumhverfinu og vekja spurningar um ábyrgð og áhrif á orðspor þeirra sem um ræðir.