Sumarið er fram undan og eru margir að skoða ferðalög um meginland Evrópu, þar sem yfirleitt er hægt að stóla á sólríka daga, enda óhætt að segja að Evrópa blómstri á sumrin. En sumir fallegir staðir verða yfirfullir af túristum yfir háannatímann og er því ekki úr vegi að hafa augun opin fyrir öðrum stöðum sem eru minna þekktir, en þeir geta verið alveg jafn skemmtilegir.

Rovinj

Króatía virðist verða vinsælli með hverju árinu sem áfangastaður, þá bæði meginlandið og eyjarnar. Norðarlega í landinu er borgin Rovinj sem liggur við sjó og einkennist af klassískum króatískum stíl, sem hefur haldist þar í áranna rás. Í Rovinj er mikið af huggulegum hótelum, og mörg þeirra bjóða upp á stórkostlegt útsýni yfir Adríahafið. Borgin er í þriggja tíma fjarlægð frá höfuðborg Króatíu en einnig er hægt að sigla að henni, frá Feneyjum, og tekur það jafn langan tíma, um þrjár klukkustundir.

Bieszczhady

Þessi staður er fyrir þá ævintýragjörnu. Bieszczady-fjallgarðurinn er staðsettur syðst í Póllandi og er greið leið að honum frá borginni Kraká. Fjallgarðurinn er óumdeilanlega gullfallegur en þar er svo mikið af gönguleiðum að ekki er hægt að komast yfir að prófa þær allar í einni ferð. Þar er svo sannarlega hægt að njóta friðsæls andrúmslofts og hlusta á fuglasöng. Við fjallgarðinn eru nokkur lítil þorp og fjölskyldurekin hótel, og einnig er hægt að tjalda á svæðinu.

Strassborg

Borgina Strassborg þekkja margir en hún er samt sem áður leynd perla þar sem hún er talin vera ein allra fallegasta borg Evrópu, en sleppur samt við það að yfirfyllast af túristum á sumrin. Borgin er einnig sérstök vegna þýskra og franskra áhrifa, en hún er í Frakklandi, uppi við landamæri Þýskalands og er það áin Rín sem skilur löndin að. Matarmenningin er því skemmtilega blönduð og dregur fólk að allan ársins hring, ásamt rólegu andrúmslofti borgarinnar.

Það er dásamlegt að ganga meðfram Rín á góðu sumarkvöldi og velja sér veitingastað til að enda daginn á, og er um ansi marga slíka að velja.

Kusadasi

Meðfram strandlengju Tyrklands er hægt að finna þó nokkrar ósnertar perlur; þorp, bæi og borgir. Meðal þeirra er strandbærinn Kusadasi en hann er í tveggja klukkustunda fjarlægð frá Bodrum og einnig er hann afar nálægt grísku eyjunni Samos.

Bærinn býður upp á gullfallegan tæran sjó, í eyjahafi Miðjarðarhafsins og eru þar bæði sand- og klettastrendur. Þar eru líka litríkir veitingastaðir sem iða af lífi á kvöldin og hægt er að smakka ferskan tyrkneskan sjávarréttamat. Fyrir söguþyrsta er tilvalið að gera sér dagamun og skoða hina forngrísku borg Ephesus, en hún er í um hálftíma fjarlægð frá miðbæ Kusadasi.

Mostar

Borgin Mostar í suðurhluta Bosníu og Hersegóvínu er eins og klippt úr málverki. Borgin er passlega stór en þar búa í kringum 100 til 200 þúsund manns. Hún þykir búa yfir miklum sjarma en hún er bæði sögurík og svo er stórbrotin náttúra hvert sem litið er.

Meðfram borginni liggja há fjöll, svo að hitinn fer oft yfir þrjátíu gráður, en þá er vinsælt að kæla sig niður í ánni Neretva sem liggur í gegnum Mostar, og þeir sem eru hugrakkir geta hoppað í ánna, af Gömlu-brúnni, sem er um 24 metra há.