Vala Valtýsdóttir lögmaður á Lögfræðistofu Reykjavíkur svarar spurningum lesenda Smartlands. Hér fær hún spuringu frá konu sem veltir fyrir sér hvort það sé vont að leigja út íbúð ef foreldri er látið eða komið á hjúkrunarheimili?

Góðan daginn,

mig langar að vita, ef annað foreldri er látið og hitt á hjúkrunarheimili og íbúð eftirlifandi foreldri stendur auð. Er slæmt að leigja hana út? Ef það yrði gert er það slæmt fyrir foreldrið sem er á lífi með tilliti til greiðslu, þarf þá að borga meira inn á stofnuninna?

Fyrirfram þakkir, 

GH

Góðan dag,

Stutta svarið er já. Leigutekjur sem og aðrar fjármagnstekjur og launatekjur hafa áhrif á bæði ellilífeyri og greiðslur vegna dvalar.

Þátttaka í dvalarkostnaði á dvalar- og hjúkrunarrýmum er tekjutengd og hefst frá sama tíma og greiðslur falla niður.

Við útreikning á fjárhæð ráðstöfunarfjár skulu tekjur lækka ráðstöfunarfé um 65% uns greiðslur falla niður.

Ef tekjur eru umfram 133.122 krónur á mánuði, eftir skatt, eftir að lífeyrisgreiðslur hafa fallið niður, þarf að taka taka þátt í dvalarkostnaði en að hámarki 582.654 krónur á mánuði.

Mögulega skapast réttur á ráðstöfunarfé þegar dvöl á stofnun hefst en slíkar greiðslur eru einnig tekjutengdar, þannig að allar tekjur, þ.m.t. lífeyristekjur (þó ekki úttekt viðbótarlífeyrisparnaðar og fjármagnstekjur hafa áhrif á slíkar greiðslur.

Kveðja, 

Vala Valtýsdóttir lögmaður. 

Liggur þér eitthvað á hjarta? Þú getur sent Völu og öðrum lögmönnum á Lögfræðistofu Reykjavíkur spurningu HÉR.