Jóhanna Gísladóttir GK, togari Vísis, landaði fullfermi síðastliðinn laugardag og aftur í gær. Fyrri túrinn hófst rólega en endaði með þokkalegum afla á Eldeyjarbanka, var því haldið þangað strax í síðari túr, að því er fram kemur í færslu á vef Síldarvinnslunnar.

Smári Rúnar Hjálmtýsson var skipstjóri í fyrri veiðiferð en haldið var til veiða frá Skagaströnd, en þar landaði Jóhanna Gísladóttir GK afla síðastliðinn mánudag.

„Það var byrjað út af Vestfjörðum, í grunnkantinum út af Patreksfirði. Þar var aflinn í lagi til að byrja með en minnkaði síðan. Við færðum okkur og reyndum út af Snæfellsnesi en þar var ekkert að hafa. Þá var haldið á Eldeyjarbankann og þar var þokkalegasti afli, góður fiskur – þorskur og karfi. Þegar komið var á Eldeyjarbankann var komið blíðuveður og mikið voru menn fegnir að vera lausir við bræluskítinn sem ríkt hefur,” er haft eftir Smára Rúnari.

https://www.mbl.is/200milur/frettir/2025/03/05/thad_var_hundleidinlegt_vedur/

Sem fyrr segir landaði togarinn afla sínum í Grindavík á laugardag og hélt til veiða að lokinni löndun, en þá hafði skipstjórinn Einar Ólafur Ágústsson tekið við í brúnni.

„Við héldum beint á Eldeyjarbankann og fylltum skipið á tæpum tveimur sólarhringum. Þarna fékkst þorskur og karfi. Þetta var stuttur túr og það var veitt í algerri blíðu. Við munum halda til veiða strax að löndun lokinni,“ segir Einar um seinni veiðiferðina.