Bakarinn og konditorinn Guðrún Erla Guðjónsdóttir bakaði fermingartertuna sem boðið var upp á í hennar eigin fermingu en þá töfraði móðir hennar, Hulda Sigurþórsdóttir, tertuna fram. Hún var afar hrifin af kökunni þá og handbragði móður sinnar en í dag er hún hrifnari af smjörkremstertum og bakaði hún eina slíka á dögunum.
Guðrún er 24 ára gömul og hefur lokið konditor-námi í Danmörku. Hún útskrifaðist með sérstöku hrósi fyrir góðan árangur á sveinsprófi sínu og hefur tekið þátt í baksturskeppnum og hefur meðal annars unnið í keppninni um Köku ársins sem haldin er árlega,
„Mamma er föst á því að hafa þessa klassísku fermingarbók“
Þegar Guðrún fremdist var fermingarveislan haldin heima og boðið var upp á glæsilega máltíð og kaffihlaðborðið kom á eftir.
„Við vorum með fermingarveisluna mína heima hjá okkur. Við buðum meðal annars upp á hamborgarhrygg með brúnni sósu og sykurbrúnuðum kartöflum. Síðan voru kjúklingagrillspjót og fermingarfranskar eins og kallaðar voru. Einnig var fjölbreytt úrval af meðlæti, grænar baunir og salat svo fátt sé nefnt.
Síðan var boðið upp á glæsilegt kaffihlaðborð á eftir. Ég man vel eftir fermingartertunni en mamma sá um hana. Mamma var alveg föst á því að hafa þessa klassísku „fermingarbók“ þannig hún tók sig til og gerði kökuna alveg sjálf. Ég var líka mikið fyrir ljósbláan lit á þeim tíma, þannig að sjálfsögðu var kakan í þeim stíl. Síðan gerði hún kransaköku og Rice Krispies-köku líka,“ segir Guðrún dreymin á svip.
„Fermingartertan var þessi klassíska marsípanterta með svambotni, rjóma og kokteilávöxtum. Mamma skreytti hana síðan með súkkulaði og marsípanskrauti sem hún lærði að gera á kransakökunámskeiði. Síðan var hún líka með fersk ber á kökunni.“
Smjörkremskökurnar eru heitastar í dag
Í dag myndi Guðrún velja að vera með smjörkremsköku. „Ég er mikið búin að vera að fylgjast með kökutískunni undanfarið og hef tekið eftir að smjörkremskökur eru þær heitustu núna, sérstaklega hjá minni kynslóð. Þessi kaka, sem mig langar að deila uppskriftinni að með lesendum, er draumurinn núna. Hún er algjör sprengja, þó að ég segi sjálf frá.“
Fermingartertan hennar Guðrúnar
- 140 g smjör
- 350 g sykur
- 30 g kakó
- 2 egg
- 2 tsk. salt
- 2 ½ tsk. matarsódi
- 2 ½ tsk. lyftiduft
- 3 tsk. vanillusykur
- 330 g hveiti
- 1 dl súrmjólk
- 2 dl heitt kakó (Guðrúnu finnst best að nota KitKat dolce
- gusto-kakóið)
Smjörkrem
- 825 g flórsykur
- 300 g smjör
- 300 g smjörlíki
- 100 g kakó
Aðferð:
- Setjið allt hráefnið saman í skál og blandið vel saman þar til fallegt krem verður til.
Fylling
- 2 bakkar fersk hindber
- 5-6 stk. Lion bar (eða þitt uppáhaldssúkkulaðistykki)
- 1 bolli heitt kakó, til að bleyta botninn og fá hann extra safaríkan
Aðferð:
- Byrjið á því að hita bakarofninn í 180°C hita.
- Takið síðan hrærivélarskál og byrjið að útbúa botninn.
- Þeytið saman sykur og smjör þar til það er létt og ljóst.
- Bætið síðan einu og einu eggi út í, munið að skafa niður hliðarnar á milli.
- Blandið síðan öllum þurrefnunum saman og bætið út í.
- Setjið að lokum súrmjólkina og kakóið út í blönduna.
- Smyrjið hringlaga form og hellið deiginu í.
- Setjið formið inn í ofn og bakið við 180°C hita í 35-40 mínútur eða þar til þú getur stungið eldhúshníf eða kökuprjón í kökuna og ekkert kökudeig loðir við prjóninn.
- Takið kökuna út og leyfið henni að kólna.
- Skerið hana í tvennt og bleytið báða hlutana með heitu kakói.
- Lagið síðan smjörkremið og undirbúið hráefnið fyrir fyllinguna, sjá lýsingu fyrir neðan.
- Sprautið lagi af smjörkremi á kantinn að neðri botninum.
- Skerið Lion bar og hindberin í bita og setjið á botninn.
- Sprautið smjörkremi yfir og setjið síðan hinn botninn ofan á. Smyrjið þunnu lagi síðan yfir kökuna og leyfið henni að vera í kæli yfir nóttu.
- Skreytið kökuna daginn eftir eins og ykkur finnst fallegast. Hægt er að skreyta hana í því litaþema sem verður í veislunni.
- Berið fram kökuna við stofuhita og njótið vel.