Formaður landsstjórnar Grænlands segir landið opið fyrir nánari tengslum við Bandaríkin á sviðum á borð við námugröft.

„Við þurfum að eiga viðskipti við Bandaríkin. Við höfum hafið viðræður og leitað tækifæra til samstarfs við Trump,“ sagði formaðurinn Múte Egede á blaðamannafundi á Grænlandi.

Samkvæmt umfjöllun Guardian kvaðst hann helst horfa til samstarfs á sviði námugraftar en gat þess þó ekki hvort honum hugnaðist að Trump næði þar yfirráðum á Grænlandi.

Grænland er, eins og flestum er kunnugt, danskt sjálfstjórnarsvæði en Donald Trump, fyrrverandi og tilvonandi Bandaríkjaforseti, hefur gert sér vonir um að festa kaup á landinu og kveðst ekki útiloka að beita hervaldi til að ná því á sitt vald.

https://www.mbl.is/frettir/erlent/2025/01/07/utilokar_ekki_ad_beita_hernum_til_ad_na_graenlandi/

Vilja hvorki vera Danir né Bandaríkjamenn

Grænlendingar hafa lengi haft hug á sjálfstæði frá Danmörku. Egede lýsti því nýverið yfir að Grænlendingar þyrftu að taka skref í átt að sjálfstæði sínu. 

Í opinberri heimsókn til Danmerkur í síðustu viku sagði Egede að Norðurskautssvæðið væri að ganga inn í nýtt tímabil á nýju ári þar sem Grænland væri í raun „nafli alheimsins“.

Hann sagði að Grænland héldi áfram samstarfi við Bandaríkin en lagði áherslu á að það yrði á þeirra eigin forsendum og að grænlenska þjóðin myndi ákveða eigin framtíð.

„Við viljum ekki vera Danir. Við viljum ekki vera Bandaríkjamenn. Auðvitað viljum við vera Grænlendingar,“ sagði hann.

https://www.mbl.is/frettir/erlent/2025/01/06/graenlendingar_stigi_i_att_ad_sjalfstaedi/

Bandarískir hermenn þegar á Grænlandi

Auk mikilvægrar staðsetningar Grænlands er þar mikið af ósnertum jarðefna- og olíuauðlindum, þrátt fyrir að olíu- og úranleit sé bönnuð, sem kunna að hafa hrifið Trump.

Vakti það athygli í síðustu viku að elsti sonur hans heimsótti landið í nokkra klukkutíma, en Donald Trump yngri hélt því fram að hann væri þar eingöngu í þeim tilgangi að ræða við heimamenn.

Tilvonandi varaforseti Trump, JD Vance, hafði orð á því í viðtali við Fox News um helgina að Bandaríkin væru nú þegar með hermenn á Grænlandi í herstöð á norðvesturhluta landsins.

https://www.mbl.is/frettir/erlent/2019/08/27/margir_kostir_vid_kaup_a_graenlandi/

Grænland tilheyri Grænlendingum

Trump talaði fyrst um kaup á Grænlandi árið 2019, þegar fyrra kjörtímabil hans var að líða undir lokin.

Forsætisráðherra Danmerkur, Mette Frederikssen, tók alfarið fyrir möguleikann á slíkum kaupum þá sem nú og segir „Grænland tilheyra Grænlendingum“.

Bandamenn Trumps úr Repúblikanaflokknum í fulltrúadeild Bandaríkjaþingsins vinna nú að því að afla nægs stuðnings við drög að frumvarpi sem myndi heimila viðræður á slíkum kaupum.

Hafa ráðamenn víða í Evrópu brugðist við ummælunum og ýmist biðlað til fólks að taka þau ekki of alvarlega enn sem komið er, eða varað Trump við því að hóta ríki innan Evrópusambandsins.

https://www.mbl.is/frettir/innlent/2019/08/20/thegar_islendingar_girntust_graenland/