Hafnaryfirvöld í Singapúr segja að flutningaskipið sem skall á brúna Francis Scott Key í bandarísku borginni Baltimore með þeim afleiðingum að brúin hrundi og lokaði þannig einni umsvifamestu höfn Bandaríkjanna, hafi staðist tvær skoðanir erlendis á síðasta ári.
Þannig hafi öll tilskilin leyfi og skírteini, sem ná yfir bæði burðarvirki skipsins og virkni búnaðarins, verið í gildi þegar slysið átti sér stað. Hafnaryfirvöld tóku jafnframt fram að í júní hafi eftirlitsmælir fyrir eldsneytisþrýsting verið lagaður.
Þá buðu hafnaryfirvöld í Singapúr bandarísku strandgæslunni aðstoð við rannsókn málsins og lögðu rannsakendur frá stofnun sem hefur eftirlit með öryggi í samgöngumálum í ríkinu leið sína til Baltimore seint í gær.
https://www.mbl.is/frettir/erlent/2024/03/26/bru_hrundi_i_baltimore/
Átta verkamenn féllu í ána
Í tilkynningu frá hafnarstjórn Baltimore segir að skipið hafi orðið aflvana skömmu áður en það skall á brúnni. Fyrir vikið gat áhöfnin ekki stýrt stefnu skipsins.
Enn fremur segir að áhöfnin hafi varpað akkerinu þegar mönnum varð ljóst að skipið myndi skella á brúnni. Engin úr áhöfninni slasaðist.
Talið er að átta verkamenn, sem störfuðu að næturlagi við holufyllingar í brúnni, hafi fallið í ána. Tveimur verkamönnum var bjargað þaðan, annar var ómeiddur en hinn alvarlega slasaður. Sex er enn saknað og eru þeir taldir af í ljósi þess hve langt er liðið frá því að brúin hrundi. Hefur nú hlé verið gert á leitinni að þeim.
https://www.mbl.is/frettir/erlent/2024/03/27/gera_hle_a_leitinni/
Efast burðarvirki brúarinnar
Einhverjir sérfræðingar hafa bent á að burðarvirki brúarinnar geti ekki hafa verið rétt varið því þá hefði það átt að standast áreksturinn frá flutningaskipinu.
Toby Mottram, prófessor í byggingaverkfræði við háskólann í Warwick, segir höggið við slysið hafa verið töluvert, sérstaklega í ljósi þess að skipið var hlaðið miklum farmi auk þess sem skipið var á nokkurri ferð.
„Það er augljóst að brúin þoldi ekki höggið. [...] Umfang tjónsins á yfirbyggingu virðist í óhófi við orsökina,“ segir hann.
Hafnarstjórn Baltimore hefur þó tekið fram að hrun brúarinnar hafi ekkert haft með burðarvirki hennar að gera.
Hrunið muni hafa alvarleg áhrif á svæðið
Yfirvöld hafa lokað brúnni þar til annað verður tilkynnt og umferð verður beint frá brúnni á meðan björgunarstarf heldur áfram. Embættismenn hafa þó sagt að leit og björgunaraðgerðum sé að linna og að nú sé lögð ríkari áhersla á uppbyggingu og endurheimt brúarinnar.
Þá er jafnframt fylgst grannt með eldsneytisleka frá flutningaskipinu.
Búist er við því að hrun brúarinnar muni hafa alvarlega áhrif á svæðið, meðal annars á umferð, auk þess sem tafir gætu orðið á skipaferðum vegna alls ruslsins sem flýtur um ána í kjölfar slyssins.
Ein mikilvægasta höfnin í Bandaríkjunum
Höfnin í Baltimore er níunda mikilvægasta höfnin í Bandaríkjunum, bæði þegar metið er umfang innflutningsvara og verðmæti þeirra. 15 þúsund manns starfa við hafnartengd störf og eru afleidd störf talin um 140 þúsund.
Höfnin í Baltimore er ekki bara mikilvæg í vöruflutningum heldur einnig fyrir skemmtiferðaskip. Um 440 þúsund farþegar lögðu úr höfn frá Baltimore á síðasta ári.
https://www.mbl.is/frettir/erlent/2024/03/26/myndir_hrunid_mun_raska_flutningum_til_bandarikjann/