Fjölskylda Katrínar prinsessu af Wales hefur staðið þétt við bakið á henni í gegnum erfið veikindi síðustu vikur og mánuði. Katrín gekkst undir aðgerð á kviðarholi í byrjun árs og greindi frá krabbameinsgreiningu á föstudag í stuttu myndbandi sem var birt á sameiginlegri samfélagsmiðlasíðu hennar og Vilhjálms Bretaprins. 

https://www.mbl.is/folk/frettir/2024/03/22/katrin_i_krabbameinsmedferd/

Að sögn Katie Nicholl, sérfræðings í málefnum bresku konungsfjölskyldunnar, þá hafa foreldrar Katrínar, Michael og Carole Middleton, verið við hlið dóttur sinnar og veitt henni stuðning, ómælda umhyggju og hvatningu. Nicholl ræddi um veikindabaráttu Katrínar í viðtali við Entertainment Tonight á þriðjudag. 

„Foreldrar Katrínar og yngri systkini, Pippa og James, eru klettarnir í lífi hennar þessa stundina, þá sérstaklega foreldrar hennar,“ útskýrði Nicholl. „Þó svo þau sjáist sjaldan þá eru þau ávallt til staðar fyrir Katrínu.“

https://www.mbl.is/folk/frettir/2024/03/24/katrin_og_vilhjalmur_djupt_snortin/?sign=4

Deildi fallegri færslu

James, bróðir Katrínar, birti fallega og einlæga færslu á Instagram-síðu sinni á dögunum. 

„Í gegnum árin höfum við klifið nokkur fjöll. Við fjölskyldan munum einnig klífa þetta í sameiningu,“ skrifaði James við mynd af þeim systkinunum á ungdómsárum. 

https://www.mbl.is/folk/frettir/2024/02/28/hvar_er_katrin/

Mikið fjaðrafok hefur verið í kringum prinsessuna og bresku konungsfjölskylduna síðustu vikurnar. Ýmsar samsæriskenningar skutu upp kollinum um meint hvarf Katrínar sem ekki hafði sést opinberlega síðan um jólin.