Matur | Sunnudagsblað | 19.11.2017 | 11:09

Átta tíma kássan

mbl.is

Þessi dásamlega kjöt- og baunakássa býður upp á að gera sunnudaga þægilega. Hægt er að henda í hana kl. 11 að morgni og fara svo út að leika allan daginn og koma beint heim, henda baununum út í og maturinn er tilbúinn eftir fimm mínútur.

Átta tíma kássan

500 g nautahakk
1 ½ msk. ólífuolía
½ laukur, gróft saxaður
1 hvítlauksrif, kramið
4 gulrætur, smátt skornar
500 ml tómatpassata
500 ml niðurskornir tómatar í dós
400 ml grænmetissafi frá einhverju vönduðu merki
3 ½ bollar nautasoð
1 tsk. þurrkuð basilíka
1 tsk. óreganó
1 tsk. timjan
2 msk. Worchestershire-sósa
2 msk. hlynsíróp
örlítið af þurrkuðu chili (má sleppa)
salt og pipar eftir smekk
1 dós nýrnabaunir
1 dós cannellini-baunir, smjörbaunir eða aðrar góðar hvítar baunir
parmesanostur

Aðferð:

Brúnið hakkið á pönnu, setjið til hliðar. Setjið ólífuolíu á sömu pönnu og mýkið lauk, hvítlauk og gulrætur í 5 mínútur.
Setjið kjötið og grænmetið saman í eldfast mót með loki. Hrærið tómatpassata, niðurskornu tómunum, grænmetissafanum og nautasoðinu saman við ásamt basilíkukryddi, óreganó, timjan, Worhestershire-sósunni, hlynsírópi og smakkið til með salti og pipar. Setjið í ofninn og látið vera við lágan hita, 120°C, í 8 tíma. Einnig má hafa þetta á hellu í þykkbotna potti við lágan hita í sama tíma, en passa þar að botninn sé góður svo kássan brenni ekki við. Eftir 8 tíma má bæta við baunum og elda í 5 mínútur til viðbótar, einnig er gott að setja pasta saman við og láta það vera þann tíma sem stendur á pakkanum.
Berið fram með rifnum parmesanosti og sumum þykir gott að hafa hvítlauksbrauð eða ristað súrdeigsbrauð með.