Gul viðvörun víða um land

Búast má við áframhaldandi hvassvirðri á Suður- og Suðausturlandi í kvöld og í nótt og fram frameftir annað kvöld. Þó mun hlýna og gera má ráð fyrir rigningu samhliða vindinum á morgun. Á Faxaflóasvæðinu er spáð hvassri austanátt síðdegis á morgun og er sérstaklega varað við snörpum vindhviðum við fjöll, meðal annars Hafnarfjall og Kjalarnes.

Þá gætu heiðar í nágrenni höfuðborgarsvæðisins sérstaklega orðið slæmar í þessari vindátt að sögn Haralds Eiríkssonar, veðurfræðings á Veðurstofu Íslands. Hann segir að ekki stefni í að vindurinn verði jafn mikill og í suðaustan áttinni um daginn, en það verði samt leiðinda hvassviðri. Segir hann að í borginni verði þó líklegast nokkuð skaplegt veður.

Veðurstofan hefur nú bætt við gulri viðvörun á Vesturlandi, Vestfjörðum og Norðurlandi vestra og nær viðvörunin frá því annað kvöld og fram á hádegi á þriðjudaginn.

Frétt af mbl.is

Óveður á leiðinni

Segir Haraldur að frá Breiðafirði og norður í land megi búast við talsverðu hríðarveðri eftir kvöldmat á morgun. „Það er nóg af lausum snjó á Vestfjörðum og Norðurlandi vestra og þar verður þetta líklega skafhríð,“ segir hann og bætir við að við slíkar aðstæður sé mjög lélegt ferðaveður. Segir hann að í raun eigi allir sem eru á ferðinni næstu tvo sólarhringa að fylgjast vel með veðurspá. Ekki sé endilega líklegt að vegum verði lokað, en að veðrið geti engu að síður reynst mörgum erfitt.

• Blogga um frétt