Forsvarsmenn United Silicon fara nú yfir gögn en heimild til greiðslustöðvunar fyrirtækisins rennur út á morgun. Karen Kjartansdóttir, talsmaður fyrirtækisins, sagði að frekari fregnir væru væntanlegar á morgun en vildi að öðru leyti ekki tjá sig um málið.
United Silicon fékk í lok ágúst heimild til greiðslustöðvunar til 4. desember svo að unnt væri að rétta reksturinn af. Var heimildin síðan framlengd til 22. janúar. Samkvæmt norskum sérfræðingum sem unnu úttekt á verksmiðju United Silicon í Helguvík kostar 25 milljónir evra, 3,1 milljarð íslenskra króna, að klára verksmiðjuna og koma mengunarvörnum í lag.
Alþjóðlegir aðilar í kísiliðnaði hafa sett sig í samband við Arion banka, stærsta hluthafa United Silicon og lýst yfir áhuga á aðkomu að starfsemi verksmiðjunnar. Kostnaður Arion banka vegna reksturs United Silicon frá því að félagið fékk heimild til greiðslustöðvunar nemur meira en 600 milljónum króna, eða um 200 milljónum á mánuði. Kröfuhafar hafa einnig lýst yfir áhuga en ekki er útilokað að fyrirtækið verði sett í þrot.