„Við stofnuðum Tulipop fyrir sjö árum á Hönnunarmars“, segir Helga Árnadóttir annar stofnanda Tulipop. Signý Kolbeinsdóttir er meðstofnandi og jafnframt listrænn hönnuður vörumerkisins, sem var stofnað til að búa til skapandi en jafnframt fallega vörulínu fyrir börn. Signý er nú flutt til New York þar sem þær stöllur hafa opnað skrifstofu og náð samningi við dreifingaraðila vestanhafs.
Í Magasíninu á K100 sagði Helga fyrirtækið á góðri siglingu. Á dögunum var opnuð skrifstofa í Bandaríkjunum og af því tilefni gerði Signý vegglistaverk með karakterunum úr Tulipipop heiminum á Venice Beach, fjölförnum stað í Los Angeles. Listaverkið er hluti af markaðsherferð þeirra í Bandaríkjunum þar sem vörur þeirra eru komnar inn í fjölda verslana.
Sjá frétt mbl.is um málið, Íslenskur ævintýraheimur á Venice Beach.
Helga lýsir því hvernig þær stækkuðu fyrirtækið og fjármögnuðu hverja framleiðsluna á fætur annarri. í dag er fyrirtækið með 70 vörulínur í sölu.
„Við erum sjálfar búnar að setja einhverjar 70 vörur á markað síðan Tulipop var stofnað,“ segir Helga. „Helstu verðmætin í Tulipop er þessi ævintýraeyja og persónurnar og hugverkið sem slíkt, sem við höfum verið að vernda með vörumerkjaskráningum.“ Helga segir að nú séu þær að gera samninga við dreifingar- og framleiðsluaðila sem hafa góð sambönd inn í stórar verslunarkeðjur.
Einnig er ný hafin framleiðsla á Tulipop þáttum sem sýndir eru á YouTube og nú þegar hafa 160.000 manns fylgst með ævintýraveröld þeirra Signýjar og Helgu.
Sjá frétt Mbl.is - Teiknimyndir frá Tulipop á YouTube
Viðtalið má nálgast í heild hér að neðan.