Klukkan 15.45 í dag eru nákvæmlega 9 ár liðin frá Suðurlandsskjálfta. Skjálftinn mældist 6,1 stig og átti upptök sín suðvestur af Selfossi, skammt frá Ingólfsfjalli.
Skjálftinn fannst vel á höfuðborgarsvæðinu og raunar allt til Ísafjarðar.
Steinunn Jakobsdóttir, deildarstjóri á Veðurstofunni, sagði í samtali við mbl.is fyrir níu árum að skjálftinn flokkaðist sem Suðurlandsskjálfti og tengdist því skjálftunum sem urðu árið 2000.
Jarðskjálftarnir tveir sem riðu yfir Suðurland í júní 2000 mældust 6,5 til 6,6 stig á mælum Veðurstofunnar og Jarðvísindastofnunar Bandaríkjanna.
Viðskiptavinur Atlantsolíu á Selfossi hélt að bensíndælan væri biluð en skjálftarnir riðu yfir á sömu stundu og hann dældi á bílinn. Hann mun sennilega aldrei gleyma þessari ferð á bensínstöðina en upptök skjálftans áttu sér stað aðeins 9 kílómetrum þar frá.
Myndskeið af þessu má sjá hér að neðan: