Einn bíll keyptur síðustu þrjú ár

Forsætisráðuneytið hefur keypt eina bifreið frá árinu 2014 og var hún keypt að undangengnu útboðsferli hjá Ríkiskaupum. Bifreiðin sem keypt var er af tegundinni Mercedes Benz S 350 Blue Tec Sedan árgerð 2015 og er eldsneytisgjafi hennar dísilolía. 

Kemur þetta fram í svari Bjarna Benediktssonar forsætisráðherra við fyrirspurn Svandísar Svavarsdóttur, þingmanns VG, þar sem hún spyr um bifreiðakaup ráðuneytisins.

Ennfremur kemur fram í svari Bjarna að bifreiðakaup ráðuneytisins hafi verið í samræmi við markmið tillögu til þingsályktunar um aðgerðaáætlun um orkuskipti sem nú liggur fyrir Alþingi. Samkvæmt skilmálum útboðsins voru gerðar tilteknar öryggis-, umhverfis- og gæðakröfur, þar á meðal var kveðið á um að bifreiðin skyldi vera umhverfisvæn, þ.e. hvað varðar koltvísýringsmengun og sparneytni.

„Orkugjafar sem til greina komu í útboðslýsingu voru bensín, dísill eða rafmagn. Bifreiðar sem knúnar voru áfram með vélum sem nota samspil þessara orkugjafa komu einnig til greina. Í útboðsskilmálum var nánar tiltekið að CO² mengun skyldi ekki vera yfir 170 g/km og að eyðsla skyldi vera undir 7 lítrum/100 km í blönduðum akstri. Við útboð vegna bifreiðakaupa í framtíðinni mun ráðuneytið, eins og áður, leitast við að gæta ýtrustu öryggis-, umhverfis- og gæðakrafna og tekur þar m.a. mið af ályktun Alþingis um aðgerðaáætlun um orkuskipti sem og fyrirhugaðri samgöngustefnu fyrir Stjórnarráðið,“ segir að endingu í svari ráðherra.

• 1 blogg um fréttina

Bloggað um fréttina

• Ómar Ragnarsson: Heildar kolefnissporið liggur ekki alltaf í augum uppi.