Slökkvilið höfuðborgarsvæðisins var kallað út vegna elds á annarri hæð fjölbýlishúss við Þverbrekku í Kópavogi. Eldur var bundinn við eitt herbergi og er búið að slökkva hann. Unnið er að því að reykræsta.
Tilkynning um brunann barst um klukkan 10:35. Alls voru þrjár stöðvar sendar á vettvang.
Engan hefur sakað samkvæmt upplýsingum frá varðstjóra slökkviliðsins.
Hann segir að leigjandi í íbúðinni hafi brugðist rétt við og náð að sprauta úr slökkvitæki á eldinn. Því næst lokaði hann herberginu og náði að komast út. Skemmdir eru því eingöngu bundnar við herbergið og lítill reykur fór fram í íbúðina og enn minna fram á stigaganginn, því reyndist ekki þörf á að rýma stigaganginn.
Eldsupptök eru ókunn og málið er í rannsókn.