Haldið var upp á aldarafmæli Leikfélags Akureyrar, sem var í gær, með hátíðardagskrá í Samkomuhúsinu síðdegis að viðstöddu fjölmenni. Forseti Íslands, Guðni Th. Jóhannesson, hélt erindi og meðal þeirra sem skemmtu voru nokkrir af fyrstu fastráðnu leikurunum í sögu LA, Sunna Borg, Saga Jónsdóttir, Gestur Einar Jónasson og Aðalsteinn Bergdal, en þau eru öll heiðursfélagar. Hljómsveitin Hundur í óskilum fór með gamanmál og fluttar voru tónlistarperlur úr 100 ára sögu Leikfélagsins.
Afmælisrit og tónlistarveisla
Leikfélag Akureyrar var stofnað 19. apríl 1917 og verður aldarafmælinu fagnað út árið með margvíslegum viðburðum. Í haust kemur út afmælisrit þar sem saga félagsins frá 1992 til dagsins í dag er rakin og þá ætlar Menningarfélag Akureyrar, í samstarfi við Sinfóníuhljómsveit Norðurlands, að standa fyrir veglegri afmælistónlistarveislu á haustmánuðum.
Jón Páll Eyjólfsson, leikhússtjóri - sem átti einmitt líka afmæli í gær - segir Leikfélag Akureyrar hafa verið alfvaka og skapandi kraft í sviðslistum. „Saga félagsins er algerlega samofin sögu þess samfélags sem það sprettur úr fyrst sem áhugaleikhús og svo sem atvinnuleikhús. Leiksýningar félagsins hafa orðið að segul fyrir áhorfendur heima og handan heiða. Auk þess hefur félagið gert strandhögg með sínar leiksýningar í höfuðborginni við frábæran orðstír,“ sagði Jón Páll í ávarpi í tilefni tímamótanna.
Aflvaki og skapandi afl til framtíðar
„Nú á þessum tímamótum er ekki bara um vert að líta til baka heldur taka stefnuna fyrir framtíðina. Aðgengi, mennska, hlutdeild, fjölbreytileiki, forvitni og gjafmildi eru vörður sem Leikfélagið vill hafa að leiðarljósi í þeirra víðasta skilningi í allri sinni starfsemi í framtíðinni. Það vill framleiða metnaðarfulla dagskrá sem hefur að leiðarljósi nýsköpun í sviðslistum og þá skyldu að færa sígild skáldverk nær áhorfendum í dag og þannig skapa ný samfélagsleg verðmæti. Leikfélagið vill rækta hæfileika ungs listafólks í frumsköpun í sviðslistum og vera gróðurhús fyrir hugmyndir, staður þar sem draumar geta ræst. Rödd ungs fólks er mikilvæg og ungu fólki skal gefið tækifæri til að eiga stefnumót við áhorfendur. Spurningum og rannsóknum borgaranna er gefinn snertiflötur við sitt samfélag í verkefnum Leikfélags Akureyrar,“ segir leikhússtjórinn og bætir við að endingu: „Með þessar vörður að leiðarljósi viljum við tryggja að Leikfélag Akureyrar verði aflvaki og skapandi afl til framtíðar.“