Jóakim Danaprins og eiginkona hans Marie prinsessa fóru fyrr í dag í verslun Epal í Skeifunni þar sem þau skoðuðu danska hönnun. Ljósmyndari mbl.is náði þessum myndum þar sem þau skoðuðu verslunina ásamt eiganda Epal, Eyjólfi Pálssyni.
Tveggja daga opinber heimsókn Jóakims og Marie hófst í gær. Er heimsóknin hluti af 100 ára afmæli Dansk-Islandsk Samfund hvers tilgangur er að styrkja tengsl ríkjanna.
Þau fóru í Norræna húsið í gærkvöldi en í morgun fóru þau í bíltúr um Reykjavík þar sem þau skoðuðu áhrif dansks arkitektúrs. Þá skoðuðu þau Hörpu í morgun og Epal nú eftir hádegi eins og fyrr segir.
Í kvöld munu hjónin sækja hátíðarkvöldverð Dansk-Islandsk Samfund á Hótel Holti.