Þetta er þriðja árið í röð sem Reykjanesbær safnar saman á framkvæmdaþingi upplýsingum um helstu framkvæmdir á árinu. Fjölmenna starfsmenn verktaka og aðrir áhugamenn á þingið og hlýða á samantektir fulltrúa stofnana og fyrirtækja.
Fasteign hf. byggir og rekur fasteignir fyrir Reykjanesbæ. Jónas Þór Jónasson, hjá þróunarsviði fyrirtækisins, gerði grein fyrir helstu framkvæmdum þess á árinu. Stærsta einstaka framkvæmdin er bygging 50 metra keppnislaugar og sundagarðs við Sundmiðstöðina við Sunnubraut. Framkvæmdum er að ljúka og er áætlað að taka mannvirkið í notkun í apríl. Verið er að undirbúa annan áfanga Akurskóla í Tjarnahverfi, en það er íþróttahús og sundlaug. Fyrirhugað er að hefjast handa með vorinu. Þá er verið að undirbúa byggingu sex deilda leikskóla í Tjarnahverfi og hefst jarðvinna í næsta mánuði og einnig er verið að athuga með stækkun þeirra leikskóla sem fyrir eru.
Ýmis önnur verkefni eru í þróun hjá Fasteign og Reykjanesbæ. Jónas nefndi félagsaðstöðu fyrir Keflavík, íþrótta- og ungmennafélag, íþróttasvæði vestan Reykjaneshallar, félagsþjónustumiðstöð fyrir eldri borgara og byggingu tónlistarmiðstöðvar við félagsheimilið Stapa. Heildarkostnaður við framkvæmdir í Reykjanesbæ í ár er áætlaður 0,9 til 1,1 milljarður kr.
Haukur Einarsson, verkfræðingur hjá HRV, sagði frá vinnu við undirbúning ákvörðunar um byggingu álvers Norðuráls í Helguvík. Áformað er að senda Skipulagsstofnun tillögu að áætlun vegna mats á umhverfisáhrifum álvers í næstu viku og að frummatsskýrsla verði lögð fyrir í vor eða sumar. Reiknað er með að niðurstaða umhverfismatsins muni liggja fyrir næsta vetur. Haukur sagði verktökunum að reikna mætti með því að bygging álversins yrði brotin niður í fjölda tilboðspakka, eins og gert hefði verið við byggingu álvers Norðuráls á Grundartanga, til að auðvelda innlendum verktökum að koma að framkvæmdinni.
Miklar framkvæmdir eru á Keflavíkurflugvelli, aðallega á vegum Flugstöðvar Leifs Eiríkssonar. Stefán Jónsson, forstöðumaður fasteignasviðs FLE, gerði grein fyrir þeim. Framkvæmt verður fyrir 3,7 milljarða kr. í ár, aðallega í breytingum og stækkun á núverandi flugstöðvarbyggingu. Þeim miklu framkvæmdum á að ljúka eftir ár. Stefán boðaði að ekki yrði staldrað mikið við eftir það, eðli starfseminnar væri þannig að halda þyrfti áfram. Spáði hann því að í framhaldinu yrði ráðist í stækkun landgönguhliða flugstöðvarinnar.
Á vegum Flugmálastjórnar verður fragtflughlaðið við Flugstöðina tvöfaldað. Þá kom fram hjá Ómari Ingvarssyni, af áætlunar- og þróunarsviði Flugmálastjórnar, að hafnar væru framkvæmdir við aðstöðuhús fyrir tvær bílaleigur og þjónustubyggingu á vegum Sverris Sverrissonar ehf. á nýju þjónustusvæði utan flugvallargirðingar.
Jónas Snæbjörnsson, umdæmisstjóri Vegagerðarinnar, sagði frá helstu vegaframkvæmdum á Suðurnesjum. Þar ber hæst annan áfanga tvöföldunar Reykjanesbrautar. Þá kom fram hjá honum að von væri til þess að Borgavegur, nýr stofnvegur inn í Reykjanesbæ, yrði boðinn út á næstu mánuðum.
Hér að framan er sagt frá framkvæmdum í nýju hverfunum. Í gamla bænum er það helst að við Keflavíkurhöfn eru fyrstu turnarnir risnir í fyrirhugaðri háhýsabyggð og fleiri á leiðinni og verið að deiliskipuleggja Vatnsnesið. Verið er að skipuleggja Hlíðahverfi á Neðra-Nikkelsvæði í Njarðvík og strandbyggð í Innri-Njarðvík.
Einar Guðberg hjá Meistarahúsum og Halldór Ragnarsson hjá Húsanesi sögðu frá framkvæmdum á vegum fyrirtækjanna sem eru stórtæk í uppbyggingunni í Reykjanesbæ.
Smáragarður ehf., sem er í eigu sömu aðila og Rúmfatalagerinn, undirbýr byggingu stórrar verslunarmiðstöðvar á landi sem fyrirtækið hefur keypt í Innri-Njarðvík. Er það svæðið við Reykjanesbraut þar sem nú er körtubraut Reisbíla. Áætlanir gera ráð fyrir byggingu 23.500 fermetra verslunarhúss, auk 1.000 fermetra húss fyrir veitingastaði og 1.500 fermetra fyrir bensínstöð. Til samanburðar má geta þess að húsið er tvöfalt stærra en Glerártorg á Akureyri sem Smáragarður reisti. Agnes Geirsdóttir, framkvæmdastjóri Smáragarðs, segir að unnið sé að undirbúningi. Í húsinu verði stórverslanir, meðal annars verslun Rúmfatalagersins, einnig matvöruverslun, heimilisverslun, fatabúð og fleira. Stefnt er að því að framkvæmdir hefjist á næsta ári og ljúki á árinu 2008.
Árni Sigfússon bæjarstjóri tók saman niðurstöðurnar í lok framkvæmdaþings. Hann lagði áherslu á hversu ánægjulegt það væri að stór hluti framkvæmdanna væri á vegum einkafyrirtækja og hlutafélaga og talaði um 83% í því sambandi. Þá eru framkvæmdir á vegum Flugstöðvar Leifs Eiríkssonar og Hitaveitu Suðurnesja taldar með en þetta eru félög í eigu ríkis og sveitarfélaga. "Þetta sýnir okkur glöggt hvar krafturinn liggur og hvað mikilvægt er að virkja þennan kraft," sagði Árni. Hann sagði ánægjulegt að finna hversu vel verktakar hefðu tekið þeim verkefnum sem sveitarfélagið hefði ýtt af stað. Á betra verði ekki kosið. "Þannig viljum við hafa þetta, þannig veit ég að við getum unnið stóra sigra," sagði Árni Sigfússon.